Mizoram sorkarin zu khapna kalpuina tura a duan, Mizoram Liquor (Prohobition) Rules 2022-ah grape wine siam leh zawrh phal a ni lo chungin inhriatthiamnain siam phal a ni a, hetihlai hian Excise & Narcotics department-in Aizawl khawpui chhungah grape wine dap rûnpui neiin thahnem tak an man.
Excise force-te chuan thuneitu sang atanga thu an hmuh angin nimin khan Millennium Centre leh hmun danga grape wine zawrhnate chu kalchilhin dawr hrang hranga wine an zawrh – Champhai Grape Growers’ Society siam, ‘Champwine’ leh Fanai Grape Processing Industry siam, ‘Fanai Grape Juice’ thahnem tak an mansak a, dawr neitute chu Excise office-ah an hruai an ni.
Grape wine zawrhte an inmansakna hmuna awm, The Zozam Times zawhna chhangin Excise force-te chuan an puten wine zawrhna hmunte dap tura an tih anga che an ni tih an sawi a, hetianga grape wine dap rûnpui hi an la nei ngai lo tih an sawi.
Millennium Centre chhunga grape wine zuartute chuan hetia excise-ten an thil zawrh an mansak thut mai chu hrilhhaithlak an tih thu The Zozam Times an hrilh a, “Winery lamah an siam theih reng tho avangin zawrh phal ni turah kan ngai a, warning pawh awm loin ti hian min rawn mansak ta thut mai a ni,” an ti.
Excise force-ten grape wine dap rûnpui an neih chungchanga The Zozam Times zawhna chhangin Excise Minister Dr K Beichhua chuan zu khapna kalpuina tura duan, Mizoram Liquor (Prohobition) Rules-ah chuan alchohol tel hrim hrim chu zawrh chhuah phal a nih loh thu a sawi.
Excise force-te chet lakna chungchang sawi bawkin, Dawrpui pheiah alchohol tel tam Korean beer leh wine zawrh a tam thu report an dawn anga hma la ta an nih thu a sawi a, MLP Rules-ah wine siam phalnate ziah lan a nih loh avangin alchohol a tel chuan an man zel tur thu a sawi bawk.
Mizorama thar chhuah grape hmanga wine siamte man a nih chungchangah hian Champhai Grape Growers Society hruaitute chuan grape wine an siam chhuah thahnem tak man a nih chu rilru natthlak an tih thu sawiin, sorkar chet dan chu hrilhhaithlak an tih thu leh Inrinniah hemi kawngah hmalak zel turte chu pawl hruaituten an ngaihtuah nghal dawn tih an sawi bawk a ni.