Ladakh-ah Zirtawpni khan sipai phurtu lirthei chesuala Shyok lui bulah tlain a phurh zinga mi sipai pasarih an thi tih thuneituten an sawi.
Lirtheiah hian sipai 26 an chung a, kham awih takah tlan liamin a thlanga kawr thui takah an tla lut a ni.
“Sipai 26-te hi Transit Camp, Partapur atanga ramri hnaih lam, Sub Sector Hanif pan tur an ni a. Zing dar 9:00 velah, Thoise atanga km 25 vela hlaah kawng atanga tlan liamin Shyok luiah an tla lut a, feet 50-60 vela thui an lum a, a chuangten hliam an tuar vek a ni,” tiin sipai thupuangtu chuan a sawi.
Chhanchhuah hna thawh nghal niin sipaite hi an vaiin Partapur-a field hospital-ah dah vek a ni tih a sawi bawk.
“Sipai pasarih chu an thi tih tihchian a ni tawh a, an hliam an tuar chhuak zo ta lo a ni. Hliam tuarte chu a tha thei ang bera enkawlna pek niin thlawhna hmangin Air Force chuan a na zual chu Western Command-ah an phur a ni,” an ti bawk.
President Ram Nath Kovind, Prime Minister Narendra Modi and Congress hruaitu Rahul Gandhi te chuan chhiatna thleng pawi an tih thu leh hliam tuarte chu an dam chhuah leh thuai an duhsak thu an sawi hlawm.
“Ladakh-a lirtheia chetsualna thlengah kan sipai huaisen tak tak thenkhatin nunna an chân hi a hrehawmin a pawi tak zet a. Lusun chhungte ka tawrhpui a, hliam tuarte pawh rang taka an dam leh theih kan ka tawngtaipui a ni,” tiin Rashtrapati Bhavan chuan Twitter-ah a tar lang.
Prime minister chuan puih theihna awm ang angte dapsak nghal an nih thu a sawi a. Thil thleng pawi a tih tak zet thu a sawi bawk.