Aizawl: Zirtawpni khan Lengteng GSA buatsaih, Hliappui-a Volleyball Tournament chu F Rodingliana’n khuallian niin a khuh hawng.
Hliappui Volleyball Court-a tournament hawnna inkhawmah khuallian hian infiamnaa hmasawn tur chuan ram sum leh paiin a zir a ngai tih a sawi a. “Ram sum leh pai tha tur chuan ram inrelbawlna a that a ngai a, ram inrelbawlna \ha nei tur erawh chuan kan ram politics hian kawng dik a zawh a ngai a ni,” a ti.
F Rodingliana hian mi tinin politics bengkhawn a ngai tih sawiin, ram hian hruaitu tha a mamawh a, hruaitu tha lo chhuak tur chuan mi tinin politics ngaihven a tul tih a sawi a. Chutih rualin party politics ruihchilh ni lo, ram inrelbawlna politics hi ram hmasawnna tur ber a nih avangin a pawimawh thu leh ngaihven a tul thu a sawi.
Tunlai khawvelah mi tam tak eizawnna hi politic-a innghat nia a hriat thu sawiin, “Leilung nena inzawm eizawnna kan kalpui a ngai a. Hemi tur hian kan sorkar pawh a than harh a ngai hle a ni,” a ti a. Tunah chuan ram hausa apiang hi infiamnaah pawh hma an sawn emaw tih tur a nih thu leh, Mizoram pawh hi ei leh bara kan intodelh loh chuan infiamnaah hmasawnna tak tak a awm theih a rin loh thu a sawi bawk.
F Rodingliana hian Lengteng bial hi sumdawnna leh sorkar hnaah pawh Zoram khawvelah tun hmain mi hriat a hlawh ve thin tih a sawi a. Tunah hian eng dinhmunah pawh ding mah se, tuna thlen chinah duhtawk mai loin, hma lam pan zel turin kal khawm te a chah.
Volleyball tournament-ah hian Lengteng bial huam chhunga khaw 12 atangin infiammi an kalkhawm a. Khuallian F Rodingliana chuan Lengteng GSA te hnenah sum fai leh jersey a pe bawk.