Congress party Treasurer Zodintluanga Ralte, MLA chuan an insiam that mek thu leh a hun taka an tho chhuak leh dawn tih sawiin, “Congress party tan zamna tur reng reng a awm lo,” a ti.
Zirtawpnia Congress Bhavan-ah Congress Party Friday Political session neihah thu sawiin Zodintluanga Ralte hian, “Congress party chu nasa takin kan insiam tha mek a, president hoin district fan chhuah programme kan hmang mek a, bial zawng zawng tlawh chhuah programme ‘Tomir Fehchhuah’ kan hmang mek bawk,” tiin, Congress President Lalsawta’n siam that hna nasa taka a thawh mek thu leh party mi leh sate an phur thar avangin a hun takah Congress party an tho chhuak leh dawn tih a sawi.
CLP Leader hian ZPM party chungchang sawiin, “ZPM hi an bul tanna a sang lutuk a, tunah chuan an than a tawp tawh, hmasawn ngaihna an hre tawh lo. An lawm luh tam zawkte pawh kum 2018-a ZPM thlawptu ni sa vek an ni. An hotute inngeih lohna, siam that ngaihna an hriat miah loh hian ZPM hi a vaw chhe dawn,” a ti.
Aizawl East II bial chhung veng tina Congress President Lalsawta hmasawnna hnathawh leh bialtu MLA ni mek, Sports Minister Robert Romawia chu a hnathawh engtik lai pawha en ho an cho tih sawiin, “Pu Robert Romawia’n Aizawl East II bial chhunga Pu Lalsawta kum 10 hnathawh aiin MNF kum thum hnathawh a tam zawk tiin April 14, 2022 khan Aizawl East II MNF Block Conference-ah a sawi a. Aizawl East II bial chhunga veng tina Pu Lalsawta hmasawnna hnathawh leh Pu Robert Romawia hnathawhte hi engtik lai pawhin en ho kan cho a ni tih Robert Romawia hian lo hre rawh se,” a ti bawk.