Kum 20 chuang liam ta atanga sorkar puihnaa grape chingtuten an thar chhuah tihral kawngah kawng bumboh a la zawh tluang zel a, sorkara lungawi lohna an lantir hma ngeiin zalen taka grape atanga siam wine-te chu zawrh ve tawh an duh a, tun hnaia excise force-ten ‘Champwine’ an mante chu a bo abang awm loa a dawr neitute hnena pe let vek turin sorkar an phut.
May 27, 2020 khan Excise & Narcotics department-a thawktuten Aizawl chhungah grape wine dap beihpui an thlak a, Mizoram atanga thar chhuah grape atanga siam wine thahnem tak an man.
Ram chhunga kuthnathawktute thar chhuah atanga siam sorkarin a mansak hian sawi zui a hlawh hle a ni.
An thar chhuah atanga an siam, ‘Champwine’ thahnem tak sorkarin a mansak hnu, May 28, 2020 khan Champhai Grape Growers Society (CGGS) member-ten Tlangsam Winery-a Packing Hall-ah General Body meeting an nei nghal a, resolution siamin, “Grape atanga siam ‘Champwine’ May 27, 2022-a excise department-in an mante hi a bo abang awm lovin pe leh ngei rawh se,” an ti.
Grape chingtute chuan wine an siam chhuahte chu zalen taka hralh ve tawh an duh a, ‘Champwine’ chu man tawh lo turin sorkar chu na takin an phut bawk a ni.
CGGS chuan grape an thar chhuah hralhna kawngah a tlem berah kg khatah Rs 5 tala support price siamsak turin sorkar an phut a, kumina an grape thar chhuahte chu an lungawina tawk ngeia leisak an phut bawk a ni.
Champhai leh Hnahlanah chhungkaw 200 chuangin grape hi chingin eizawn nan an hmang a, kum 2010 atang khan grape atangin wine an siam tan a, Mizorama siam chhuah wine hi duhthusamin hralh chhuah a ni lo thung.
Mizorama kohhran lian ber, Synod-in an grape tuite chu sakramental wine-ah an hman ve theih an duh a, Inrinnia CGGS General Body meeting chuan Synod-in wine a leisak theih nan hmalak an rel a ni.
Champhai atanga thudawn danin Champhai winery-ah tun dinhmunah Rs 32,54,400 man ‘Champwine’ um 32,544 dah khawl a awm mek a, hei bakah hian grape tui sawr tawh, wine-a la siam loh litre 1,10,000, Rs 2,93,33,300 man dah khawl mek a ni bawk.
CGGS-ah hian branch pakuaah member 130 an awm mek a, Ngur khuain member ngah ber in 30 an nei a ni.
Sorkar kum 2021-22 chhung khan CGGS-in wine an siam chhuah atangin Rs 1,61,67,201 an lei chhuak a, Ministry of Food Processing Industries atangin winery extension atan Rs 1,77,65,000 an dawng a, state sorkar hnuaia horticulture department atangin tanky siam nan Rs 2,88,000 an dawng bawk a ni.
Hnahlan tlangdungah chhungkaw 100 velin eizawnna atan grape an ching mek a, Hnahlan winery-ah grape tui sawr sa, wine-a la siam chhuah loh litre 40,000 vel an dah khawl mek bawk.
Kar kalta Zirtawpnia grape wine thahnem tak an mante chu a tih zui zel dan tur hi a mantu excise department-in an la ngaihtuah lo niin thudawn a ni.