Mizorama tlawmngai pawl hrang hrang inzawmkhawm, NGO Coordination Committee-in Mizoram sorkara chief secretary atana Mizo ngei dah an phutna sorkar laipuiin a tihhlawhtlin loh avanga lungawi lohna lantir nan vawiin atangin Chief Secretary Renu Sharma pisa kai tur an dang dawn.
NGO-Coordination Committee chairman, R Lalngheta, Central YMA president hovin NGO-CC hruaitute’n nimin khan Aizawl Press Club-ah chanchinbumite an kawm a, Mizo IAS an awm reng lai leh state sorkar leh mipui aw ngaithla duh lova sorkar laipui hmalakna chu zawm har an tih avanga chief secretary hna chelh lai pisa kai tur dan an tum thu an puang.
Mizoram sorkara chief secretary atana Mizo ngei dah a nih theih nana an hmalakna hrang hrangte NGO-CC General Secretary Prof Lalnuntluanga chuan sawiin vice president, prime minister, Mizoram larsap, union home minister leh ministry of home affairs te hnenah ngenna tum eng emaw zat an thehluh tawh thu a sawi.
Prof Lalnuntluanga chuan Mizoram chief secretary dinhmun luah tura Mizote tling an awm reng lai leh an ngennate sorkar laipuiin a ngaih pawimawh lo chu hnam tlem zawkte dinhmun hriatthiampui lohnaah NGO-CC in an ngai tih a sawi a, “Mizo chief secretary a awm tur hian beisei theih a ni lo tih chu kan hmuhpui a; mahse, tling leh thei an awm chhung chuan ram leilung fate Mizo duhsak kan phut,” a ti.
Chief secretary ni mek chu a mi mal takin dona a nei lo tih sawiin, hetih rual chuan he dinhmun chelh thei tur Mizo IAS an awm reng lai leh sorkar leh mipui aw ngaithla duh lova sorkar laipui hmalakna chu zawm har an tih thu a sawi.
The Zozam Times zawhna chhangin NGO-CC hruaitute chuan tun dinhmunah chief secretary hna chelh thei chu Mizo zingah pakhat a awm a, Zohnathlak Mizo tawng hmang thiam zingah IAS 10 bawr vel an awm a, an vaiin he hna chelh thei ni lo mah se hna chelh thei an awm nual tawh thu an sawi.
Mizo tawng hmang thiam lo chief secretary an awm hian harsatna hrang hrang a thlen thin a, Covid-19 leng vanga mipui inkhuahkhirhna duan kawngahte pawh thil buaithlak a lo thleng tawh tih an sawi a, “Cabinet meeting-ah pawh secretary ni tur a nih rualin Mizo tawng a thiam loh avangin secretary a ni thei lo,” an ti.
Central services-te hian an awmna hmuna tawng tualleng chu an thiam ve zel thu NGO-CC hruaitute chuan sawiin, tuna chief secretary hna chelh mek erawhin a thiam lo a, tun hnaia sorkar hotute leh tlawmngai pawl hruaitute an thutkhawm tum pawhin tawng lehsak a ngai a, sorkar hnathawk zinga hotu lu ber chu ram mipuiten an dawr fo a ngaih avangin Mizo tawng thiam lo chu an buaithlak hle tih an sawi.
Sorkar laipui nawr nana chief secretary pisa kai tur an dan hnuah pawh an duh anga hmalakna a awm lo a nih chuan an kal zel dan tur chu an la ngaihtuah leh dawn tih a sawi a, an thiltih chu ram leh hnam tan a nih thu leh tharum thawha che tur an nih loh thu an sawi bawk a ni.