Thingzai leh a kaihhnawih thilsiam hmanga sumdawng – Mizoram Wood Based Industries Owners Association (MWBIOA) hruaitu ten nimin khan Larsap Hari Babu Kambhampati hmuin, thingzai, thingzai leh thing hmanga an thil siam chi hrang hrang state pawna thawnchhuah kawnga an harsatna te an thlen a. An harsatnate sutkian a nih theihna tura hma laksak turin an ngen.
Larsap chuan MWBIOA member te harsatna tawh dan te chiang zawka a lo zirchian hnuah sorkar laipui lamah a theih anga lo nawr a tum thu MWBIOA hruaitute chu a lo hrilh a. Mizoramah industry lian tham awm rih lo mahse, industry tenau, sum thawkchhuak thei a tam thei ang ber din a tul thu sawiin, hemi atan hian thalai mithiam zawk te entrepreneur ni tura a tam thei ang ber an penchhuah a tul thu leh Mizoramin tun aia sum a thawhchhuah tam theihna tura entrepreneur tam tak a mamawh thu a sawi.
MWBIOA President C. Thanchuanga’n an harsatna tawh dan te a sawifiah a. An thil siam te state pawna thawnchhuak tura rel hmang chauha phurh chhuah theih chu kawngpui pangaia lirthei lian hmanga an phur phalsak tura Ministry of Environment, Forest and Climate Change-a ngensak turin Larsap chu a ngen a. Myanmar atanga Zokhawthar kaltlanga thingzai phurhluh theihna tura hmalaksak turin Mizoram Larsap chu a ngen bawk a ni.