BJP Mizoram Pradesh chuan nimin khan Upper Republic-a an pisa-ah State Executive Meeting an nei a. BJP Mizoram In-charge Mmhonlumo Kikon, MLA-in a hman pui.
State President Vanlalhmuaka meeting kaihhruaiah hian M Kikon hian BJP Mizoram hmasawnna hmel thar hmuh tur a awm reng chu lawmawm a tih thu leh MADC inthlan neih zawh taka MDC 12 an nei thei chu ropui a tih thu a sawi a. Hei hian nakkum MLA General Election huna BJP dinhmun nasa takin a hril dawn tih a sawi.
“Mizoram mipuiten BJP-ah rinna an nghat tawh hle niin a lang tawh a. Kum 2023 MLA election-ah sorkar tura inbuatsaih sauh sauh turin ka ngen che u a. Mizoramah state danga development thleng ang hi kan hmuh ve theihnan thahnemngai takin BJP chanchin hrechiang lo mipuite i hre theuh ang u,” M Kikon hian a ti.
Meeting-ah hian JB Rualchhinga, State Vice President-in ‘Economic Resolution’ a thehluh hnuah, Nirupam Chakma, National Council Member (NCM) pawhin ‘Political Resolution’ a thehlut a. An resolution thehluhteah siam that ngaite siam tha leh tur tura tiin an pawmpui a ni.
Hemi hnu hian Prime Minister Narendra Modi sorkar kum riat chhunga a hmalakna hrang hrangte inhrilhhriatna hun an nei a ni.
Hlawkna um lo party
Mizorama hlawkna um lo political party chu BJP a ni tih nimin khan State President Vanlalhmuaka’n a sawi.
An pisaa State Executive meeting-ah mi thar lawm lutin Mizoramah BJP-in hma nasa takin a sawn mek tih sawiin, “Mizorama sorkar tawhte hmalakna en hian lung a awi thei lo a ni. Chuvangin, BJP thupui ‘First Nation, Party Second, Self Last’ a nih angin mahni hlawkna um lo party awmchhun chu BJP hi kan ni mai awm e,” a ti.
Vanlalhmuaka hian Mizoram mipui zaa 80 vel kuthnathawka eizawngte hmakhua thim mek tiêng turin Modi kaihhruai BJP a awm reng tur thu a sawi a. Mizoram sorkarin kuthnathawktute harsatna tawh an ngaihthah chu pawi a tih thu a sawi a. BJP chuan mamawhtute sorkar, mipui sorkar an din dawn tih a sawi.
Mizoram BJP president hian radio announcer lo ni tawh, Lalhmerliani Fanai chu BJP-ah a lawm lut a ni.