Jammu & Kashmir-ah hnam leh sakhaw zuitu tlem zawkte tawrhna thlen chhunzawm lehin sikul zirtirtu, Hindu hmeichhia chu Kulgam district-ah kah hlum leh a ni.
Kum 36 mi, Rajni Bala-i hi Samba-a cheng niin a hnathawhna, Kulgam-a Gopalpora-ah mi firfiakten an kap tih police chuan an sawi.
Na takin a hliam a, damdawi in panpui nghal a ni a, an thlen chuan doctor-ten a thi tawh tih an lo sawi a. Police chuan he pawikhawihnaa tel mi firfiakte hi chhui chhuak thuaiin hremna pek an ni dawn tih an sawi.
Zirtirtu hi Gopalpora-a high school bulah niin a hmun hi mi dang tlawh theih loh tura khar nghal a ni.
National Conference Vice President Omar Abdullah chuan zirtirtu thahna chu ‘nunrawnthlak’ a tih thu a sawi.
“Rajni-i hi Samba district, Jammu province-a cheng a ni a. Kulgam, South Kashmir-ah sorkar hnuaiah zirtirtu hna thawk a ni a, nunrawng taka beihna avangin a nunna a chân ta a. A pasal, Raj Kumar leh a chhungte ka tawrhpui a, tharum thawhnain mi chhungkua a khawih chhe leh ta a ni,” a ti.
“Tun hnaia ralthuam pawh nei ve lo civil mite tum reng vanga thahna thleng thin chhunzawm zelna a ni a. Sorkarin a demna leh a tawrhpuina thu ringawt hian boruak a tipangngai thei dawn lo,” a ti bawk.
People’s Democratic Party (PDP) President Mehbooba Mufti pawhin sorkar laipuiin Kashmir-ah boruak a tha niin sawi mah se tum renga mi thahna a tam tual tual niin a sawi.
“Sorkar laipuiin dawta Kashmir boruak a pangngai nia a sawi mek laiin tum renga civil mi thahna a pung a, ngaihven a ngai tak zet a ni. Dawizep taka chetna hi BJP thil sawiin Muslim huatna a tihpunlun vanga thleng a ni,” tiin Twitter-ah a tar lang.
People’s Conference hruaitu, Sajad Lone leh BJP pawhin an dem thu an sawi bawk.