India hmarchhaka mi, Sikkim chu lo lam neihna zawng zawnga siam chawp ni lo thil, organic-a innghat vek (organic state) hmasa ber ramah puan a ni ta.
Sikkim hi ‘World Book of Records London’ chuan he nihna hi an hlan a ni.
‘World Book of Records London’-in he nihna an hlan tak avang hian Sikkim hi khawvela a hmasa ber an ni a, an lo leh thlai hmun zawng zawngah a zavaiin organic policy an kalpui tihna a ni.
Sikkim Governor Ganga Prasad chuan an nihna thar tar lanna citation hi Gangtok-a a hlanna hun hmanah state aiawhin a dawng a ni.
World Book of Records London hian Himalaya tlangdunga awm, Sikkim hi pawikhawihna awm lohna ‘crime free state’ tiin a sawi bawk.
“Sikkim state (India) hi khawvela organic state hmasa ber atan leh sorkar that avanga crime free state a ni tih hei hian a lantir,” tiin citation-ah hian tar lan a ni.
World Book of Records London hi pawl niin khawvel puma thil chi hrang hrang danglam bikte finfiaha nihna pe thin, hriat hlawh tak a ni.
Sikkim hi kum 2016 daih tawh khan India rama siamchawp thil hmang miah lova lo neih kalpui state hmasa ber lo ni tawhin lo hectare 75,000 zeta zauvah bawlhlo tel lova lo neih an kalpui tawh.
India bika organic state hmasa ber a nihna hi Prime Minister Narendra Modi hova Gangtok khawpuia Sikkim Organic Festival 2016 an hman khan hlan an ni a. Modi-a hian Organic Certificate hi Chief Minister Pawan Chamling hnenah a hlan a ni.
Sikkim Organic Festival 2016 hi National Conference on Sustainable Agriculture & Farmers Welfare peng pakhata neih a ni nghe nghe.
Hemi tum hian Modi-a chuan Sikkim-a nauban chi thum siam chu a hawng nghe nghe a ni.