MBSE Chairman JH Zoremthanga chuan Covid-19 leng vanga hun rei tak chhung zir pangngai kalpui theih a nih loh avangin kumin HSSLC result percentage chu hniam deuh mah se zirlaite quality erawh a chhe hran loa an hriat thu a sawi.
Nimina HSSLC Examination 2022 result tihchhuah a nih hnua chanchinbumite a kawmnaah JH Zoremthanga chuan nikum aiin kumina pass percentage chu hniamin, a pum puia lakin hniam deuhin lang mah se a thiamate erawhin mark an hmu sang hle tih a sawi a, “Subject hrang hrang kan en chuan zaa za mark hmute pawh an awm a, an quality hi a chhiatna vak tur kan hre lo,” a ti.
Online class ngawt a tawk lohna subject a awm thu sawiin, subject thenkhat class kal ngei ngei ngai a awm a, chungah chuan an fail nasa reng tih a sawi.
Hri lengin a nghawng nasatzia sawi chhunzawmin, “Art subject-ah chuan chhiar ngai a tam a, hri leng nghawng chu a rawn lang ta a, fail pawh an tam ta reng a ni,” a ti.
HSSLC zirlaiah syllabus 30% tihtlem a ni a, zawhna har ang chite pawh telh tlem a nih thu a sawi a, session tharah chuan syllabus chu 100% tur a nih tawh thu MBSE chairman chuan a sawi.
Exam an buatsaih lai kha Covid-19 leng a hluar lai ni mah se tluang takin exam an buatsaih thei tih a sawi a, exam hall atanga hnawh chhuah ngai pawh an awm loh thute sawi bawkin, result tluang taka an tih chhuah theihna tura thawktute chungah lawmthu a sawi bawk a ni.