Rafael Nadal-a’n French Open chanchin a player ropui ber a nihna chhan a lantir leh a. Kumin semi-final luh inchuh a inkhelah a elpui hlun Novak Djokovic lakah hnehna a chang.
Thawhlehni zanlai, Nilaini zingkar thlenga inkhelah hian a vawi 14-na atana Roland Garros a champion tum Nadal-a’n a khingpui lakah bul tha takin a tan a. A tanhmun a siam hnuah champion lai Djokovic hian chak ngei tumin beilet ve mahse Spanish star in a lo veng tluan thei hram a. 6-2 4-6 6-2 7-6 (7-4) in Nadal a chak.
Darkar li chuang inkhel hi zing dar 4:45 khan an khel zova. Grand Slam vawi 21 champion tawh Nadal hian semi-final ah seeded number 3 Alexander Zverev a hmachhawn leh ang.
Lei lalpa a ni tlat
Tun tournament a seeded number 5 hauhtu Nadal hian nikum semi-final a a ngam loh tawh a khingpui lakah a chetchhiatna a nawhreh leh chiah a. Paris khawpui a clay court inelna lian berah match 113 a khelh atangin vawi 110 a chak tawh.
Nadal leh Djokovic te hi mipa tennis-ah inel hlun tak an ni a, vawi 59 an inhmachhawnna niin vawi 29 Nadal a chakna a ni a, vawi khatin Serbian star a la chak tam zawk.
Paris mipui in an tualzawla infiammi hlawhtling ber zing ami Nadal an lawm a. Lei a tennis khelah ani tluka record nei tha an awm lova,a hnehna chan tawh zinga ropui ber pawl ni turin Djokovic lakah a khel.
Tun kartawp a kum 36 tling tur hian nung takin bul a tan a, set hmasa berah che tha nghal in a ball vuak a dik thin chu a chetthatna chhan a ni a. Round hmasa zawka Felix Auger-Aliassime laka a inkhel nen a danglam hle.
Quarter-final lut turin Auger-Aliassime lakah set nga khelh a mamawh tawh bawk a, hei vang hian Nadal-a tan semi-final khelh hma a ni khat awl awm tur a tangkai dawn.
“Novak laka chak tur hian kawng khat chauh a awm a, chu chu a tir atanga a tawp thlenga tennis tha thei ang ber khelh a ni. Paris mipui chungah ka lawm a, zan duhawm tak min siamsak.” tiin a sawi.