Thawhlehzan khan Indian zaitham lar tak KK chu concert a neih zawh hnu lawkah a thi.
Kum 53 mi Krishnakumar Kunnath (KK) hian 1990s chho atang khan hla za tam a sa tawh a, Bollywood hla lar tak tak te pawh a sachhuak hnem hle.
Kolkata khawpuia a thlenna hotel-ah hemi zan hian a tlu a, rang taka Damdawi In panpui ni mah se, chhan hman a ni tawh lo.
A thih chhan tak hi sawi in-ang lo mah se, heart attack ni ngeia ngaih a ni.
Nimin zing khan ‘Not KK’ tih chuan social media a luah lum hneh hle a, fan te leh a thawhpuite awih harsa an ti a, a thi thu hian a barakhaih.
Prime Minister Narendra Modi pawhin tawrhpuina thu sawiin, hun lo taka a boral vangin pawi a ti hle. “A hla te hian mite thinlung chhungril a thlen phak a, kum bithliah pawh awm lovin an rilru leh ngaihtuahna thlengin a hla te hian a luah hneh hle. A hla te hmang hian kan hrereng tawh dawn a ni,” a ti.
KK thih hmâ ni hnih liam ta khan Punjabi rapper lar Sidhu Moose Wala chu kahhlum a lo ni tawh a, tunkar chhung hian Indian zaithiam lar te pahnihte thihna hi rimawi ngainatute tan channa rapthlak tak a tling.
KK hi 1968 khan Delhi-ah a piang a, zai lama tui tak ni chhovin a tir lamah hian advertisiment lam hawi hla te sa tanin film music lama vawrh lar lehzual a nih hmâ hian hla 3,500 chuang a sa hman. Indian tawng chi hrang hrang a hawlh lawr hle a; Tamil, Telugu leh Kannada tawngte pawhin hla tam tak a siam.
Hindi music industry-a a thlawhhlawkna leh tangkaina hian thangthar lo la awm zel turah pawh nghawng duhawm leh mawi bawk si a hnutchhiah chhunzawm ngei ang le.