India chhim lam, Kerala-a nula pahnih inngaizawngte chu court thu anga an inkawp zui phalsak ni mah se an chhungte an la hlau tho tih an sawi.
Kum 22 mi, Adhila Nassrin-i hian a kawppui chu a chhungten an ruksak niin sawiin court-ah petition a thehlut a, hnehna a chang a ni.
Court hian Thawhtanniah khan Nassrin-i leh a kawppui, kum 23 mi, Fathima Noora te hi zalen taka an chen dun a phalsak a ni.
An pahnih hian court thutluknaah an lawm thu an sawi a, hetih rual hian an chhungte an la hlauh avangin ‘zalenna famkim’ an la nei chuang lo tih an sawi.
India-ah hian kum 2018 khan anpui inkawp chu dan bawhchhiatna a ni lo tiin thutlukna siam tawh mah se hetiang mi, LGBT an tihte hian hmuhsitna leh phal lohna an la tawng nasa hle a. Heti chung hian khawpui lianahte chuan an tam hle thung.
Nassrin-i leh Noora-i te hian Saudi Arabia-a lehkha an zir dun lai atangin induhin an inkawp ta tih an sawi.
Kum eng emaw zat an chen dun hnuah thla hmasa khan an inkar hi an chhungte ve ve hnenah an hrilh chauh tih an sawi.
“Kan inah ti takin kum tam tak kha kan awm a ni,” tiin Noora-i hian Thawhlehni khan news channel a hrilh.
An chhungten an inkawp dan an hriat chuan nasa takin an dodal nghal a. LGBTQ-te awmna, Kerala hmar lama Kozhikode district-a mi, Vanaja Collective-ah an tlanchhe ta hial a ni.
Nassrin-i nu leh pate chuan haw tur leh him taka a let leh tur thu sawiin an ko haw niin an sawi a; mahse, a hnu ni rei vak lovah Noora-i hi zawk hi a chhungten an hruai haw lui ta a ni.
Nassrin-i hian police-ah complaint thehlutin court a thlenpui a, an pahniha chen dun a dil a ni.
Thawhlehni khan Noora-i hi court-ah inlanin a kawppui neia awm dun a duh thu a sawi a. Court pawh hian hun reilo te chhungin an duh angin thu a titlu ta a ni.
Kum 2018 khan Kerala High Court chuan anmahni ang bawka hmeichhe inkawp, pakhat zawk a chhungten an hruai luih chu awm dun a lo phalsak tawh bawk.
Thutlukna siam a nih hnuah Nassrin-i chuan an thil kalpui chu a hautak a, rilru zawng zawng a seng niin The Quint a hrilh.
“Awm dun turin thil khirh tak tak kan paltlang a ngai a ni,” tiin Noora-i chuan tual chhung TV channel a hrilh bawk.
“Chanchinbu, court, leh mi tam tak chuan min tan loh zawk kan ring sa a ni,” a ti bawk.