Aizawl : Zo Re-unification Organisation (ZORO) chuan khawvel hmun hrang hranga Zofate tana ding an nih angin an chanvo dik an hmuh theihnan leh an dikna tlangaupuina turah theihtawp chhuahin an tang zel dawn tih an sawi.
Thawhlehni khan Aizawl Press Club-ah ZORO chuan thuthar theh darhtute an kawm a. Manipur state-ah Zofa tam tak an cheng a, anni hi hmakhawsang atanga helai ram luah lum hmasatute leh a ram neitu dik tak an ni tih an sawi a. “An ram hi an luh hmain Meitei ram a ni ngai lo, British-in Meitei nen awpkhawmin Manipur hnuaiah a dah a, British an chhuah hnuah Manipur hnuaiah an awm chhunzawm zel avangin an awmna ram hi Meitei ram a ni ngawt lo, an ram hi tuma chhuhsak theih a ni lo. Manipur awp Zoramah Zofate an cheng zui zel a ni zawk,” an ti.
Manipur state chhunga Zofate ram engemawzat chu sorkarin chhuhsak tuma finrawl chhuaha reserved forest-ah a puang hi India dan kalh a nih avangin an ngaih thu tak thu leh Zofate nekna reng reng chu an dodal tlat zel dawn niin an sawi.
ZORO chuan Zofate luah ram humhalh chungchanga social media lama tawngkam neih avanga Manipur sorkarin Dr. Mark Thangmang Haokip man a, a hrengbet hi a dem takzet tih sawiin, a rang thei ang bera thu delhkilh awm miah loa chhuah zalen nghal turin an phut tih an sawi.