Sorkar ding lai an phar tlakna, Chakma Autonomous District Council (CADC)-ah sorkar thar a la piang lo a, Mizoram governor-in Governor’s Rule-ah dah mai duh tawh mah se Councils of Minister thukhawm erawhin a tulah an ngai lo thung.
May 9, 2022 khan CADC-a chief executive member (CEM) kaihhruai sorkar chu paih thlak a ni a, tun thlengin sorkar thar hi a la piang lo.
Governor-in CADC chu Governor’s Rule-ah dah mai a rawt a, hemi chungchang hi nimina Councils of Minister thukhawmin an ngaihtuah.
He thutkhawma tel minister pakhat chuan thutkhawma an thuthlukna The Zozam Times hrilhin, “CADC sorkar phar thlak a nih chhan chu party khat chhunga buaina mai a ni a, Governor’s Rule-a dah chu democracy principal kalhna a ni a, sorkar siam thei lo an ni lo bawk nen, a ngai angin kal mai se kan ti,” a ti.
Kum 2018-a MADC inthlanpui neih a nih khan MNF-in MDC pariat an nei a, Congress-in pasarih, BJP-in panga an nei a. Congress leh BJP thawk dunin sorkarna an siam a, Santi Jibon Chakma kaihhruai sorkar a ding.
Hun reilo te hnuah sorkar chu phar thlak a ni a, January, 2019-ah RM Chakma kaihhruai sorkar a piang leh a. Congress MDC pathum leh BJP MDC pakhatin MNF an zawm a ni.
RM Chakma kaihhruai sorkar hi April, 2021-ah an phar tla leh a, BJP member pahnih tih loh mi dang, Congress leh BJP member-te chu MNF-ah lutin, Durjya Dhan Chakma sorkar a piang ta a ni.
Durjya Dhan Chakma kaihhruai pawh chu paih thlak leh a ni a, nikum October 2 khan RM Chakma kaihhruai sorkar bawk a piang leh. BJP member pahnihte pawh MNF-ah an lut a, CADC-a MDC-te chu an vaiin MNF an ni.
MNF hlang an awm hnuah pawh sorkar chu a nghet chuang lo a, May 9-ah khan phar tlak leh a ni a. Hemi hnuah Budilal Chakma-a’n sorkar a siam thei tih governor hnenah a thlen a, governor hian Governor’s Rule-a dah rawtna a nei ta a ni.