Aizawl: BJP Mizoram State President Vanlalhmuaka chuan Prime Minister Narendra Modi kaihhruai BJP sorkarin rethei bakberh lutuk loa awm hi khua leh tui dikna chanvo a nih angin mipuite mamawh anga hma lak zel hi a ngaih pawimawh ber a ni tih a sawi.
Nimina an party pisa-ah BJP sorkarin kum riat chhunga mipuiten sorkar tha leh rintlak a siam dante thu thar thehdarhtute hmaah puan chhuahna a nei a. He hunah Vanlalhmuaka hian PM Modi kaihhruai BJP sorkarin kum riat chhungin 3.5 crore mi rethei chenna tur in nei loten in an neih phah thu te, India ram chhunga kawlphetha êng luh lohna khua 19,000-ah in tinah êng pek vek an nih tawh thu te, Swachh Bharat Mission kaltlangin inthiarna in (toilet) 11.22 crore siam tawh a nih thu te leh tun kum thum chhungin chhungkaw 6.2 crore te inah tui in tur thianghlim tui connection hmanga pek fel a nih tawh thute a sawi.
Heng bakah hian PM Ujjwala Yojna kaltlangin BPL chhungkua eirawngbawlna gas connection la nei lo mi 9 crore hmeichhiate hmingin a tlawnin gas connection sem chhuah tawh a nih thu te, Ayushman Card 18 crore zet pek chhuah tawh a nih thu te, ram pumah medical college 200 hawn belh tawh niin, AIIMS pawh 15 zet hawn belh a ni tawh thu te, national highway siam pawh a hma aiin 208% a chak a kalpui a nih thu te, ram pumah airport thar 80 siam belh a nih thute a sawi bawk.
Vanlalhmuaka hian Article 370 nuaibo te, The Citizenship Amendment Act pass a nih thute bakah, Mizoram atanga Tripura state-a Mizoram Bru raltlante buaina chu BJP sorkar chin fel a nih thute a sawi a ni.
Zawhna chhangin BJP state president hian sorkar laipuiin scheme hrang hrang a duan tawhte leh duan mekte chu state dangin an hnathawhte an pho lan laiin MNF sorkar leh sorkar hmasain thup tumin an pho lang ve lo tih a sawi a. “Sorkar kan hrawn mek leh sorkar hmasate khan sorkar laipui scheme duante hi an party induhsakna atan hman an ching a. Anmahni tih angin sawi an tum a ni,” a ti.