Congress President Sonia Gandhi leh a fapa, Rahul Gandhi chu Enforcement Directorate chuan National Herald chanchinbu nena inkaihhnawih thila pawisa tihchingpen thubuai kal mekah thu zawh fiah turin a ko.
Rahul Gandhi hi Nilainia inlan tura tih a ni a, a nu hi June 8-a inlan tura tih a ni ve thung.
Rahul Gandhi hi Nilainia inlan tura ram chhunga a awm lo a nih chuan June 5 hnu lama inlan tura tih a ni bawk.
Agency thuneitute chuan Prevention of Money Laundering Act (PMLA)-a criminal section hrang hrang hnuaiah an thil sawite hriat an duh tih an sawi.
National Herald hi Associated Journals Limited (AJL)-in an tihchhuah niin Young Indian Pvt Limited ta a ni a. Thubuai hi chanchinbu tichhuaktuin inbumna, inphiarna, leh dan lo anga thil a kalpui nia puhna kaihhnawih a ni.
Sorkar laipui hnuaia thil chhuitute hian tun hnaiah Congress party hruaitu hlun pahnih, Mallikarjun Kharge leh Pawan Bansal te pawh he thubuai kaihhnawihah hian thu an lo zawt fiah tawh.
Congress hruaitu pahnih leh Gandhi nufa thu zawh fiah tur hi chanpual insem dan, sum leh pai virtir vel dan leh Young Indian leh AJL vawrh lartute chet velna an hriat duh vang niin thuneitute chuan an sawi.
Agency hian kum 2013-a BJP MP Subramanian Swamy-a’n a mi mala PMLA bawhchhiaa Gandhi nufa leh mi dangte a puhna kal zelah thubuai hi an ziak lut thar leh a ni.
Gandhi nufa leh mi dangten Young Indian Pvt Ltd hmanga mi buma dik lo taka sum hmangin, Associate Journals Ltd hnenah Rs. Vaibelchhe 90.25 pek turah Rs. Nuai 50 chauh an pe nia sawi a ni.
Swamy-a’n complaint a thehluhah hian tun thlengin FIR ziah luh a la ni lo va, Delhi court-ah tihkhawtlaiin a la awm mek a. Gandhi nufa hi thubuaiah hian bail an lo ni tawh a ni.
Congress lungawi lo nasa
Congress party chuan sum tihchingpen thubuaia ED-in an hruai lawk pahnih an ko chu nasa takin an sawisel a. “Political, social, economic, leh dan hmanga beihna a ni,” an ti a. Gandhi nufa chuan engmah thup an nei lo niin an sawi bawk.
Congress MP leh dan hre mi hlun tak, Abhishek Manu Singhvi chuan thuthar lakhawmtute a kawmnaah sum tichingpen emaw, pawisa inpek tawnnaah emaw dan bawhchhiaa thil tih a awm tih finfiahna pakhatmah a awm lo niin a sawi a. Sorkar laipuiin politics-a phuba lak nan a ti mai niin a sawi a, a hnuaia thil chhuitute chu assembly inthlan lo awm turte thlir chungin an khingpuite beih nan an hmang niin a sawi.
“Pawisa engmah inrawlh lohna ni sia pawisa tihchingpenna thubuai mak tak a ni a. Lehkhadenna card infun ai pawhin a lang chiang zawk. Kan hmachhawn ang a. Phuba lakna, rilru zim, hlauhna leh politics thing tak a ni,” tiin Singhvi chuan a sawi.
Congress hian thubuai chu ba aia thil inlaksakna, hlawh inpek ang mai a nih thu an sawi a. Sorkar chuan tun laia thil tak tak zawk, thil man sang zel thup nana thil phuahchawp a vawrh mai mai niin an sawi.
Singhvi chuan thubuai hi kum 2015 daih tawhah khan ED hian a lo titawp tawh a; mahse, he thubuaia a mawh latu thuneitute sawnin mi dang a dah thar a, thubuai hi a tinung thar leh ta niin a sawi bawk.