COVID-19 hripui leng avanga thawktu indaih lohna avanga sorkarin contract-a damdawi in lama thawk tura a rawihte chuan Thawhlehni khan Imphal-a Manipur Chief Minister’s Secretariat luhchilh an tum.
Hna hrang hrang thawk tura lakte leh staff nurse thahnem tak chuan sorkarin thla li lai an hlawh a pek tawh loh pek an phut bakah rawih chhunzawm an ngiat.
Manipur state sorkar hian nikuma hripui a len lai khan thawktu an indaih loh em avangin COVID care centre hrang hranga thawk tura contract-a a rawihte an ni.
Heng mite thinrim hian ni rei vak lo liam taah khan state health services-a director pisa chu an lo kalh tawh a. Thawhtanni khan sit-in-demonstration an lo nei tawh bawk.
Thawhlehni bikah hian Babupara-a Secretariat luhkapui thleng kalin an inhawr khawm a, vengtuten nawr letin metre 100 vela hla, Nupi Lal Memorial Complex thleng an nawr let.
Health worker-te hian chief minister hmuh an tum a, hmu tura hauh lawk sana (appointment) erawh an nei lo.
Health department hian nikum August thla khan staff nurse 150, thil hrang hranga thawk tur mi 100 leh medical officer 75-te chu thla thum chhung atan thawk turin a la.
Thawktu a rawih tharte hi COVID-19 hri lenga an indaih lohna avang leh hripui nasa zawk a len pawha harsatna lian an tawh lohna tura an tih a ni.
An inrawih hun chhung a tawp hma khan Chief Minister N Biren Singh chuan an state-ah COVID-19 hripui leng a ziaawm tawh avangin contract-a an rawihte chu an mamawh zui tawh lo vang tih a lo sawi tawh.