India ram laili, Madhya Pradesh-a khaw pakhatah tuichhunchhuaha tui kang chawi tura a banga nu pakhat a lawn lai video nasa takin a darh a, hei hian India-a tui a harsatzia titi a titam hle.
Video-ah hian nu pakhat chu hrui leh rinchhan dang pawh nei lovin tuichhunchhuah mawnga tui chawi turin a bangah a chhuk lai a lang a ni.
Ghusiya khuaa chengte hian an tuichhunchhuah leh dil zawng zawng a kang vek avangin hetiang bak hian tui neih ngaihna an nei lo.
Anni chauh ni lo, India ram hmun dangah pawh tui vân tak takna a tam hle.
Video lo darh tawh thin dangah pawh nunna thapa tui chawina a lang fo thin a. April thla pawh khan tuna mi dang deuh bawka Maharashtra-a tui chawi tura tuichhunchhuah mawnga nu pakhat a lut lai a lo darh tawh.
Kum 2019-a report siamah India hi khawvela tui a harsatna ram 17-na a ni phak a ni.
Report-a a lan dan chuan Madhya Pradesh, Punjab, Rajasthan, Uttar Pradesh, Gujarat, Uttarakhand leh Haryana te chu a harsat zualna a ni.
Madhya Pradesh-ah hian nipui apiangin tui hi a vâng thin a. State sorkar chuan kum 2024-ah khaw tinah tui herh haw theih pek vek a tiam a; mahse, mi maktaduai tel chuan tui in tur thianghlim an la hmu phak rih lo.
Ghusiya-ah hian tui an harsat em avangin khaw mite chuan kumina tual chhung inthlan pawh sorkar kar nan an lo boycott tawh.
“Tui chawi turin tuichhunchhuah mawnga kan luh a ngai a. Tuichhunchhuah pathum awmte a kang vek a, hand pump awmahte pawhin tui lak chhuah theih a ni lo vek,” tiin nu pakhat chuan news agency ANI a hrilh.
“Inthlan lai apiangin sorkar hnathawk leh politics hruaitute an lo kal a. Tunah erawh chuan tui min pek hma chu vote kan thlak tawh dawn lo,” a ti.
Tun tuma video darhah hian Indian tam tak chuan an khawngaih thu leh thuneitute chu pui vat tura an ngen thu social media-ah an tar lang hlawm.
India hi khawvela lei hnuaia awm tui la chhuak tam ber ram a ni a, mi tam tak chu hetianga innghat hi an la ni.
Hetih lai hian district hmun thuma thena hmun hnih dawn chu lei hnuaia tui kangchat mek avangin an buai tan mek niin World Bank chuan a sawi.
India hian kum 2050-ah chuan tui harsatna lian tak a hmachhawn thei dawn nia sawi lawk a ni a, khawpui lian 30 pawh tel tura ngaih a ni.