- Lallunghnema, Charity Lodge
Kumtin consumer-te chawi tur kawlphetha hman man hi Joint Electricity Regulator Commission (JERC)chuan a siam chhuak thin a. JERC a awm hman hian Kawlphetha hman man hi Power & Electricity Deptt (P&E) chuan a siam thin a ni. Tunah chuan JERC hian financial year bul tanna thla April atanga hman tan turin TARIFF a buatsaihin hma a la thin a ni.
Tichuan, April to March chhunga hman turin JERC hian Tarif a ruahman ta a ni. Hemi hma thla 2 khat ral hma February thlaah mipui lo hriat leh zir atan draft tariff chu media-ah (chanchinbu) tarchhuah a ni a. Sawiselna leh rawtna nei ten ziakin JERC-ah hian petition an theh lut thin a ni. A tlangpuiin February thla tawp lamah State Advisory Committee chuan power hman chungah Agenda neiin Kawlphetha hmanna lama hmasawnna tur kawng hranga a ngaihtuah thin a ni. Kan hriat angin State Advisory Committee-ah hian mi thiam tak tak an tel a. NGO aiawh engemaw zat an tel bawk a ni.Official an tel bawk. Tunah hian JERC hian Khatla kawn bul lawkah Office an nei a. He pisaah hian Office Staff engemaw zat an thawk a. JERC ah hian tunah tak hian Pu R. Thanga chu Chairperson niin Member tanglai chu Er. L.Pachuau ni a. Assistant chief Engineer Er. Thianga leh Richard Zothankhuma Secy. te chu a hnarkaitu te an ni a. Anni ho hian rim taka thawkin Kawlphetha hman man bituk leh Kawlphetha hman lama hmasawnna tur an ngaihtuah thin a ni. An hnathawh hi a pawimawh em em a, thuneihna pawh an nei lian hle in Independent body an ni a. Mipui tana thawktu tak tak an tling a ni.
India ramah hian State tan zawkin Electricity Regulatory Commission hi a hranin an nei deuh vek tawh a. Mahse, tunah hian Mizoram leh Manipur State , thung chuan Commission pakhat an intawm a. Joint Electricity Regulatory Commission for Manipur and Mizoram tih a la ni a. Engtik hunah emaw chuan keini state pahnihte pawh hian a hranpa ve vein Commission kan nei ve thei turah ngai ila a tha ang e.
JERC hna hi a pawimawh hle a. Electric hman man bituk ringawt hi an hma lakna a ni lo va, power ruk(theft)leh bo thlau chungchanga consumerte zualkona Commission pawimawh tak a ni a. Power hman chungchanga hma sawn zelna tur an ngaihtuah thin a ni. Tin, tunlaia power bill system thar pakhat prepayment system hi Mizoram hman tan ve dan tur ngaihtuah mek niin hriat a ni a. Tunah hian pilot project atan sub-division pakhat chu hman mek a ni a. He tihchhinna leh zirna atang hian prepayment system hi a that hmel viau niin a hriat a. India ram pumah Prepayment system hi hman vek tura tih a ni nghe nghe. Chuvangin Mizorama consumer te hian han hmang se chuan power luangral mai mai tur nasa takin a tinep thei ngei dawn a. Consumer-te phunchiarna pawh a nep phah hle ngeiin a rinawm a ni. Power theft pawh a bo theih ngei beisei a ni.
Kawlphetha hi mitin nghawng, chhungkawtin nghawng, ram nghawng thil pawimawh a nih avangin lo ngaihthah ngawt theih a ni lo. Power zin kawng hi consumerte hian kan zir ve thin tur a ni. Mahse helamah hi chuan kan la ngawng viau mai. Bill a lo tamin kan phun mai a. Huaisen taka complaint pawh kan ngam em em chuang lo. Bill kalphung hrim hrim pawh hi hriat kan tam lem chuang lo.
Tum khat chu political party pakhat hruaitu hian min tibuai leh hrep a. An bill chu vawikhata pek atan chusn a lo tan riau mai a! Thil awmzia ka han zawh chuan thla 3 zet bill an lo pe lo va. Khatia a tam deuh khan a han phun a. Domestic connection ti reng chung si khan Commercial connection a ni ang te a ti hehe mai a! Hruaitu ho tak a ni. Hetiang thil ropui lo tak ka han sawi chhan hi eng dang ni lovin, “Kan power bill te hi i chik ve tawh ang u” Ka tih na mai a ni. Thahnemngaih a na si!
(April 2022 – March 2023)
Electric Tariff hi lo en ve teh. A theih chuan copy ang che. In inah tar ang che u.
Energy charge per month :-
Rate awmdan han sawi ila.
1) Rate hniam ber unit 1 atanga unit 100 inkarah (unit khatah) Rs.4.30 a ni a.
2) Rate hniam ber dawttu hi unit 101 atanga unit 200 inkarah( unit khatah) Rs. 7.10 a ni thing.
3) Rate sang berah hian unit 200 chin chunglam zawng hi (unit khatah) Rs.8.20 a ni.
Hei hi chhinchhiah khiau tur a ni:
Heng bakah hian fixed charge leh meter rent chawi tel tur a awm a. Meter hi i pawisa a i lei chuan meter rent i chawi a ngai lo, tih hria ang che. Fixed charge hi per kw Rs.50/- a ni.
Entirna pakhat chauh sawi mai ila :-
1) unit 30 hman zat ni se. 30×4.90 = Rs.147/- a ni ang a.
2) Fixed charge chu Rs 25/- a ni ang.
3) Meter rent Rs.20/- i chawi leh ang a. A vaiin Rs. 192/- I chawi zat tur a ni.
Mipui nitin nun khawih chetu ber zing mi KAWLPHETHA hman chungchang hi kan ngaihsak a tul khawp mai.Complaint a awm loh nan mitin kan inzir thiam a ngai a ni ber.Politics-a invhirh theh Kan ching em em a.PowerDepartment hna thawh hliah dawn dawn a sawisel bawrh bawrh pawh kan ching hle bawk.Awmze nei lova inchirh thehna kan pumpelh theih nan consumertinte hi kan intah hriam a ngai a ni.Ren baksak lova power hmante,power lo rukte hi khua leh tui thate chuan tih loh tawp tur a ni.