Colombia-a lungalhthei laih chhuahna khura thil puak avanga thi chu mi pakua an ni tawh a, mi paruk chu a chhungah an la tang mek tih National Mining Agency (ANM) chuan a sawi.
An ram hmar lam, El Zulia khaw bula khurah hian kar kal ta Thawhtanni khan thil na takin a puak a, hei hi a chhunga boruakalhthei tam lutuk vanga kang atanga puak nia hriat a ni a. A luhka leiverh a tichim a, a chhunga thil laichhuaka thawk eng emaw zat an tang a ni tih thuneitute chuan an sawi.
A chhunga tangte hi ni ruk chhung zet an tang tawh tihna a ni.
An chhungte chuan chhanchhuah hna thawh meka hmasawnna awm ngaichangin a bul hnaiah an fuankhawm hlawm bawk.
Chhanchhuah hna thawh mek hi a khur chhunga boruakalhthei tam lutuk avangin a sawt thei lo hle a, ruah a sur nasat bawk avangin a khaihlak nasa hle a. Thawktu mi 70 velin chhun zan zawmin an thawk mek zel niin AFP chuan a tar lang.
Thuneitute chuan engineer-ten boruak luhka siamna turin a verh reng bawk niin thuneitute chuan an sawi bawk.
Colombia-a thil laih chhuahna khur dang tam takte ang lo takin tun tuma chhiatna thlenna hmun hi dan ang thlapa siam a ni a. Kum 2021 khan a chhunga boruakalhthei tam lutuk avang hian khar a lo ni tawh a, May 19 khan hawn phal leh chiah a ni tih regional mining secretary Jhon Olivares chuan a sawi a. A hnu lawkah chhiatna an tawk zui ta a ni.
Colombia-ah hian thil laih chhuahna khura chhiatna thleng hi a tam hle a. Kumin 2021 chhung ringawt pawh khan mi 148-in an thih phah a ni.