Mizoram chhunga lui hrang hrangah tui tibawlhhlawhtu a tam chhoh zel avangin tun hma aiin mipui hnena sem chhuah atan tui tihthianghlim a ngai nasa zual hle a, a sawngbawlna atana sum senso a hautak zel chuan tui bill tipung lo thei lo dinhmunah an la awm thei tih PHE department hotuten an sawi.
The Zozam Times zawhna chhangin PHE Engineer-in-chief C Lalremsiama chuan PHE department-in lui tui an lak mipui hnena an sem chhuah turte chu uluk takin an tithianghlim thin a, tui an pump chhuah chu a bawlhhlawh viau chuan tihthianghlim a hautak a, hun a duh rei a, a bawlhlo atan pawh insenso a ngai tam tih a sawi.
A kum telin tui an sem chhuah tur chu tihthianghlim a ngai nasa zual ta hle tih sawiin, “Hetiang renga tui tihthianghlim nana sum senso a hautak zual zel a nih chuan tui bill tipung lo thei lo dinhmunah kan la awm thei,” a ti.
Lui tui a bawlhhlawh avanga harsatna an tawh thinte sawi bawkin, tui an pump dawn hian bawlhhlawh then fai phawt a ngaih thin thu leh tui an pump-ah leivung a tam chuan tanky-te a tihbalh nasat chuan tanky tihruah-te a ngai tih sawiin, hengte avang hian tui pump chhuah a khaihlak a, fur lai pawhin tui sem pawh a khaihlak phah hial thin tih a sawi.
E-in-C chuan PHE-in Mizoram chhunga tui an laknaah Aizawl chawmtu Tlawng lui chu a bawlhhlawh ta ber tih sawiin, “Tlawng lui humhalh nan Save Tlawng Project Act kan buaipui mek,” a ti.
Mizoram luiahte bawlhhlawh a tam chhan leh tuihna a tlem chhoh zel chhan chu luikam tuakte humhalh that a nih loh vang leh ramngaw a chereu zel vang a nih thu a sawi a, mipui tui tlan-Tlawng leh lui dang bul hnaia mihring an chen tam loh nan hmalak zel chu a tul hlea an ngaih thute a sawi bawk a ni.
Kawnpui & Bualpui tuitlanah vawk thi!
Kawnpui leh Bualpui mipui tui tlan lai, Tuitun luiah vawk thi paih a ni a, tui pump lai pawh tihtawp nghal niin, hemi chungchangah hian Kawnpui VC III leh Zanlawn VC ten Kawnpui Police Station-ah FIR an thehlut.
Kawnpui atanga The Zozam Times thudawn danin mi tu tih hriat lohin Tuitun luia vawk thi an paih chu mi thenkhatten thla an la a, Kawnpui VC-te hriattir a nih veleh PHED thawktute chuan enfiah nghalin vawk thi hi a lo awm ngei a; Tuitun lei (bridge) hnuai chiahah hmuh a nih avangin lirthei atanga an paih ni ngeia rin a ni.
PHE Dept., Kawnpui Police leh AH & Vety Dept. bakah khawtlang hruaituten vawk thi hi an enfiah hnuah an senghawi a, an phum nghal a ni.
Kawnpui VC III leh Zanlawn VC te chuan he thil titute hi chhui chhuaka man tur leh hremna pe ngei turin nimin khan Kawnpui PS-ah FIR an thehlut nghal a. Vawk thi hi tui atanga la chhuakin an phum nghal a ni.
Kawnpui Police chuan New Khamrang thlengin vawk thi paihtu hi an zawng nghal a, rinhlelhawm an hmuh loh bakah Tuitun lui leh a fintu luite chu humhalh a ni tih Kawnpui leh a chhehvel khuaten an hriat vek avangin hetiang thil hi an tih duh an ring lo tih an sawi a ni.
Tuitun luia vawk thi paih eng natna pawh lo kai se, tui tlantu rante tan a pawi vek thei dawn nia hriat a nih thu Kawnpui PHED-a SDO Lallawmpuia chuan Kawnpui khuaa chanchinbumite a hrilh a, hemi avang hian tui pump khawl sa, main reserviour tanky-a mi leh Tuitun Pump House-a awm zawng zawngte chu paih vek a ngai dawn tih a sawi a; tun kar chhunga tui sem chu ni eng emaw zat chhung a kaihlak rih dawn a ni tiin, mipuite hriatthiamna a ngen.
SDO chuan Chhawllen tlanga Main Reserviour Tanky-ah tui litre 13,60,000 vel dah a ni thin a; a tam tham em avangin paih ruak tur hian chhiatna dang a thlen loh nan tum khatah paih teuh ngam a ni lo a; paih ruak tur hian eng chena rei nge a duh ang tih a hriat theih loh a ni, a ti bawk.