England in Hungary chu Inrinni zanah UEFA Nations League season thara an match hmasa berah 1-0 in an hneh lova. Dominik Szoboszlai penalty hmangin Hungary an chak.
Hungary hian kum 60 chhunga a vawikhatna atan England hi an hneh a. Huntawp dawn lamah Andras Schafer chuan goal khungna remchang a neih a hloh bawk.
Puskás Aréna a inkhelah Reece James chuan second half-ah Hungary ho penalty hmuh hi a chawi a. Substitute bench atanga dah luh a nih atanga minute hnih lekah penalty hi a chawi.
England in inkhel thunun an harsat viau a, Gareth Southgate-a’n Jarrod Bowen leh James Justin te ram tana vawikhatna atan a inkhelh tir a, awmzia erawh a nei thui lo.
Southgate chuan inkhel zawhah, “Khawlum khan thui takin inkhelah awmzia a nei a, kan player-te a hmer chau hma hle.”
“Han sawisel viau ka duh lova, mahse heng inkhelte hi kan player-te tana inzirna tur tha tak a ni in ka hria.” tiin a sawi.
Inkhel dangah Germany in coach Hansi Flick hnuaia tlawm lova an kal an chhunzawm a. Nikum nipui a Joachim Low a thlak hnuah a hnuaiah vawi 10 inkhel tawhin vawi 8 an chak a, vawi hnih an draw.
Bologna khawpuia Renato Dall’Ara Stadium ah Italy tan Lorenzo Pellegrini chuan minute 70-naah goal a khung a. Hei hi minute thum hnu lekah Joshua Kimmich chuan a sut.