- Ruata
South Korea company tha leh hlun tak Hyundai chuan an compact SUV tha leh hralh kal tak mai Venue chu a thar an tichhuak dawn tih kan hre vek tawh ang a. Tunhnaiah hian Hyundai Venue hmel thar (facelift) chu an rawn phochhuak ta a, a mawi dawn khawp mai a, tunah hian tlangzarh mai thei dinhmunah an ding tawh a. He lirthei tharah hian eng nge ka hmuh dawn tih kan hriat lawk theih theih kan enho leh dawn a ni.
Tlangzarh hun tur
Hyundai Venue facelift hi tun thla ni 16-ah tlangzarh turin company lam chuan ruahmanna an siam tawh a. A lei duh te tan pawh book theih a ni tawh a, dealership hrang hrangah leh online ten Rs. 21,000 chawiin an book thei tawh a ni. Company lam hian an hun tiamah an tlangzarh ngei thei turah ngai ila, a lei duh tur te tan chuan nghah chhung a rei vak tawh lo a ni.
Design
2022 Hyundai Venue facelift hi tuna chhuak mek nena khaikhinin a design-ah danglam a awm ve neuh neuh a. Hyundai design thar – Sensuous Sportiness design philosophy kan hmu thar dawn a. A hmabawr design hi Hyundai lirthei man to hret ho Tucson leh Palisade te design a rawn pawl hle a, grille thar dark chrome a chei a rawn nei thar dawn bawk a ni. Split headlamp setup, a chung lama LED DRL leh a hnuaia headlamp te a nei dawn a. A turn indicator pawh a grille nena inzawm ni awm takin mawi takin vuah a ni.
A sir lamah chuan tuna chhuak mek nen a inang viau a. Hetihrual hian alloy wheel thar a nei a, wheel cap thar a nei bawk a ni. A hnunglamah chuan tailgate design thar hlak a nei a, LED light bar hmangin mawi takin a taillamp pawh a eng a inzawm pat a, Venue facelift lo chhuak tur hian a hnunglamah pawh hian bumper design thar a nei bawk a ni.
A chhung
Hyundai Venue thar tur hian dual tone rawng thar a nei daw a, a chhunglam pawh a dum leh beige rawng inpawlh a ni dawn a ni. Hei bakah hian 4 spoke steering wheel thar a nei ang a. Fully digital instrument console leh drive mode chi 3 – Eco, Normal and Sport te control theihna tur a hma console laiah a awm tel dawn bawk a ni.
Hyundai Venue thar tur hian technology a kentel lamah pawh hmasawnna tha tak tak a rawn nei dawn a. Home To Car (H2C) chu Alexa & Google Voice Assistant hmangin a tih theih ang a, hei bakah hian Hyundai 60+ Bluelink connected feature a nei dawn bawk a ni. Hei bakah hian a elpuite nena khaikhina a hmasa ber turin 2 Step Rear Reclining Seat a rawn nei dawn tih Hyundai chuan an puang chiang tawh bawk a ni. Venue thar hian thil thar tha tak Sounds of Nature acoustic sound chu lirtheiah hian a khalhtu leh a chuangte tana hriat nuam leh awm ti hahdam turin a ti ri thei dawn a, hetah hian inchhunga mei chhem alh ri ang te, tuipui fawn ri te pawh a in ‘play’ thei dawn a ni.
Heng kan han tarlan te bakah hian a hmaa a neih ang hmanraw hrang hrang kha chu a la neih chhunzawm zel dawn.
Variant hrang hrang leh a khawl
Hyundai Venue facelift hi trim level 6 – E, S, S+, S(O), SX and SX(O) te a awm dawn a. He SUV lo chhuak thar tur hian a hma ang bawkin khawl chi 3 duhthlan tur a rawn nei leh ang a. Hengte hi 83bhp power pechhuak thei 1.2 litre 4-cylinder naturally-aspirated petrol, 118bhp power pechhuak thei 1.0-litre 3-cylinder turbocharged petrol leh 99bhp power pechhuak thei 1.5-litre turbo-diesel khawl te a ni dawn a ni.
The 1.2 litre petrol engine hi E, S, S(O) leh SX trims-ah te manual transmission hmangin duhthlan tur a awm ang a. 1.0 litre hi S(O) trim-ah iMT emaw DCT emaw hmang duhthlan tur a awm ang a, Diesel khawl hi S+, SX leh SX(O) trim-ah te manual transmission hmangin duhthlan tur a awm dawn a ni.