Aizawl: Aizawl West bialtu MLA Lalruatkima’n nimin khan MHIP Tuikual North Branch-in MHIP Day an hman a hmanpui a; nupui pasal tlak, mawhphurhna la tlak, hnam dangte el ngam turin fate chher hriam turin kalkhawmte a chah.
Tuikual North YMA Hall-a hun hmanah thu sawiin bialtu MLA Lalruatkima hian aia upa zahnate hi tun din leh a ngai tih sawiin, “Zonunmawi tlawmngaihna a bo chuan MHIP, YMA, MUP nih a nuam lo ang a, Mizo nih a nuam lo vang. Hawh u, nute hian bul i tan ang u,” a ti.
Lalruatkima hian foreign-a hnathawk leh passport buaipui tak zawk chu hmeichhia an ni tih sawiin, “Dawrah kal ila, bazarah kal ila, sa sat chenin hmeichhia an tam zawk vek a ni. Khawnge mipate kan awm? Nute hian kan fa mipate hi kan enkawl hriam tawk lo em ni aw, tiin ka ngaihtuah fo thin,” a ti a; fate hriam lehzuala enkawl tur te, aia upa zahna leh Zonunmawi tlawmngaihna chhawm nung tura enkawlna tha zawk pe turin a chah bawk.