British Prime Minister Boris Johnson chu Conservative Party hruaitu a nihna atanga bângin tory hruaitu thar thlan a ngai dawn ta a, thlan thar chu prime minister a ni ang.
Conservative hruaitu thar thlan a nih hma chuan a nihna chu a chelh chhunzawm ang.
“Hruaitu thar thlanna kalpui tur chu tan a ni tawh a, vawiinah a tifel tur cabinet ruat a ni a, a thar thlan a nih hma hian ka dinhmun ka la luah ang,” tiin Johnson hian 10 Downing Street kawta thuthar lakhawmtute a kawmnaah Ningani khan a sawi.
“Hei hi Conservative party-a rorel khawla telte duh dan a nih angin party hruaitu thar an awm dawn a, chu chu prime minister thar a ni bawk ang,” tiin a sawi.
Kum 58 mi, Johnson-a hi sorkar a kaihhruai dana lungawi lo a mi pawimawh tak takte an bân hnuah a bâng ve dawn tih a sawi.
tory hruaitu thar thlanna hi karlehah puan chian a ni dawn a. Johnson-a hi a hun chhungin Brexit, Covid-19 hripui leh amaha rintawk lohna hrang hrangte a paltlang a ni.
Johnson-a aiawhtu thlan tur hi nipui chhunga tihfel a ni ang a, October thlaa an party annual conference neihah tihchian a ni ang tih BBC leh chanchinbu dangte chuan an tar lang.
Johnson-a chuan ‘khawvela hna tha ber chawlhsan tur chu a lungchhiatthlak’ thu a sawi.
tun hnai ni eng emaw ti kal ta atang khan Johnson-a hi buaina hrang hrangin tlakbuakin him tumin a bei nasa hle a; mahse, a thawhpui hraw tak takten an bânsan hnuah a him zo ta ngang lo a ni ber.
“A ban hi loh theih loh a ni,” tiin Conservative Party Deputy Chairman Justin tomlinson chuan twitter-ah a tar lang a. “Party kan nih angin rang taka inpumkhat leh kan ngai a, kawng hrang hrangin hun khirhin min hmuak mek a ni,” a ti.
Conservative-te hian an hruaitu thar tur an thlang dawn ta a, hei hian chawlhkar tam tak, thla eng emaw zat pawh awh thei a ni.
YouGov poll chuan Defence Minister Ben Wallace chu Conservative Party member-ten Johnson-a thlak tura a duh ber nia tar lan a ni a, a dawtah Junior trade Minister Penny Mordaunt leh finance minister hlui, Rishi Sunak te an ni.
Mi thenkhat chuan a thachhangdawltu, Dominic Raab-a kutah thuneihna a hlan dawn niin an sawi bawk.
Eptu party lian ber, Labour Party hruaitu, Keir Starmer-a chuan Conservative-in Johnson-a hi an paih nghal a nih loh chuan parliament-ah sorkar rintawk lohna an pu lut dawn tih a lo sawi tawh.
“In hnawl lo a nih chuan Labour hian ram mipuite duh angin sorkar rintawk lohna kan pu lut ang. Hetiang prime minister kaihhruaina hnuaia kal zel hi kan duh lo,” a ti.
Johnson-a duh lohna hi an ram mipuiten kum tam tak hnua sum leh pai lama harsatna an tawh nasa ber an tawh atanga intan a ni a, hei hi Covid-19 hripuiin a hrin chhuah a ni pakhat a. thil man a sang em em a, an ram eibar dinhmun thlir lawknaah kum 2023 hian ram lian zingah chuan a hniam ber an ni dawn bawk nia sawi a ni.