West Bengal Minister Becharam Manna chuan tuialhthei man to lutuk duh loh lantir nan an chenna hmun, Singur atanga km 40-a hla, Kolkata state assembly panna atan thirsakawr a hmang.
“State assembly-a budget session nang hman turin zing dar 8:00 velah ka inkhalh chhuak a, tuialhthlei man to lutuk duh loh lantirna a ni. Narendra Modi-a sorkar hi mipui mimir phurrit chhawk zangkhai kawngah a hlawhchham hle,” tiin labour minister hian a sawi.
TMC thupuangtu, Kalyan Ghosh chuan Manna hi Howrah-a Domjur veng atangin assembly panna atan km 20 vel la awm atangin a zui ve bawk.
Ghosh-a hian, “Modi sorkar hian tuialhthei man bituk kawngah a hlawhchham a. Ruahmanna leh hmathlir pakhatmah an nei lo. Mipuite veivahna chi hrang hrang leh ni tin mamawh thil man a pung tial tial a. Modi-a sorkar hian an beng an chhu ngawng lui zel,” tiin a sawi.
July 5 khan West Bengal Chief Minister Mamata Banerjee chuan Modi-a hnenah lehkha thawnin tuialhthei mana chhiah awmte chu titlem turin rawtna a thlen.
BJP hruaitu zinga mi, Dilip Ghosh chuan tuialhthei man hi a tlawm zawka hralh an duh ve vek nia sawiin international market-ah a man a to miau vangin heta lo tihtlawm ngawt theih a ni lo tih a sawi a, “Tihtheih awmchhun chu state leh sorkar laipuiin chhiah a lak tlem mai a ngai,” a ti.
Kolkata-a Keshtopur vengah pawh tuialhthei man to lutuk duh loh lantir nan cycle rally an buatsaih tawh a. Hemi tum hian an state Minister Javed Khan phei chuan bawngtawlailir a hmang hial.
Bengal sorkar hian July 1 atang khan Covid-19 vanga inkaihhruaina chu tlemin an thlahdul hret a, hetah hian vantlang inkalpawhna hmanruate a tlantir tan a; mahse, mi mal bus neitute erawh chuan tuialhthei man to lutuk vanga an sum hloh tawhte hmuh let a nih theih nan chuan man tisang turin ngenna an siam mek a, 95% laiin an lirthei an tlantir duh rih lo.