Sri Lankan President Gotabaya Rajapaksa chuan an ram mipui thinrimten a chenna in luhchilha prime minister in an hal hnuah a nihna atangin a bâng dawn tih a puang ta.
An chenna in an suasam lai hian prime minister leh president hi an awm lo ve ve.
Thla tam tak chhung an ram eibar dinhmun a chhiata mipui an mangan hle hnuah mipui thinrim inhawr khawm chuan an khawpui, Colombo-a an sorkar hotu lian pahnih chenna hi an luhchilh a, Rajapaksa bik hi nasa taka bâng tura an nawrna chu a hlawhtling ta a ni.
Rajapaksa hi July 13-ah a bâng dawn a. Wickremesinghe pawh bâng turin a intiam.
Parliament speaker chuan president hian ‘muanawm taka thuneihna inhlan’ turin bân a tum ta tih a sawi a, mipuite chu ‘dah zah turin’ a ngen bawk.
An duh berin a nihna a kalsan dawn tak avang hian an khawpuiah chuan mipuiin a lawm nan halpuah leh halmawi an hal nasa hle.
Politics hruaitute chuan boruak tha tak hnuaia thuneihna inhlan a nih theih nan tih hmabak leh rorel tur an la ngah hle a. Sipaite chuan mipuite chu boruak muanawm tak a awm theih nan venhim hnathawktute tanpuitu ni turin an ngen.
Inrinnia an ram mi pawimawhte in luhchilh a nih hnuah United States chuan Sri Lankan hruaitute chu an ram eibar dinhmun chhe mek chu rang taka ching fel turin a ti.
President chenna luhchilhtu zinga pakhat, Fiona Sirmana chuan tunah chuan president leh prime minister chu an ning tawh tak zet a, ‘Sri Lanka tan hun thar’ tan a tul niin a sawi.
“An kiang har lutuk kha pawi ka ti tak zet a, kal kiang thuai sela chuan hetiang rum rum hi a thleng lo vang,” tiin Reuters a hrilh.
Inrinnia sorkar duh lohna lantirnaah hian mi eng emaw zatin hliam an tuar a. Colombo-a damdawi in lian ber thupuangtu chuan mi pathum chu silaia kah an nih avanga enkawl an nih thu AFP news agency a hrilh.
Sri Lanka-ah hian thil man a sang chak em em a, kum 70 chhunga an eibar dinhmun chhiat lai ber tawngin ei tur, tuialhthei leh damdawi an chaw lut thei lo.
Foreign currency an an tlakchham avangin mi mal hnenah petrol leh diesel hralh an khap a, rei tak tak tuialhthei lei tura intlar a ngaih phah.
Inrinnia mipuite thiltih kha thla eng emaw zat chhung Sri Lanka hmun hrang hranga lungawi lohna lantir hnua thleng a ni.
Mipuite hian President Rajapaksa in an luhchilh dawn hian an au va, an ram flag an vai a, vengtuten an danna chu kal kânin an luhchilh a ni.
An che lai video thehdarhah chuan mipuite hi president tui chenna hmunah an cheng a, pawhdawhte hawngin a bual pindan changkangte pawh an hmang bawk.
President chenna in changkang tak an hmuh hian hun khirh tak paltlang mek an ram mipui maktaduai 22-te thin a rim zual hle nia sawi a ni.
“Ram puma chengte an mangan laiin hetiang hmun nuam lutuk din tur leh cheng chung chuan ram tana hnathawhna hun an nei lo vang,” tiin Chanuka Jayasuriya chuan Reuters a hrilh.
Rajapaksa hi boruak inmung hre lawkin Zirtawpni khan a in hi a lo chhuahsan tawh niin defence ministry chuan a sawi niin Reuters chuan a tar lang.
A bul lawka in dangah a riak nia sawi a ni a; mahse, finfiah a awm lo.
Mipui hian Colombo daiha Prime Minister Wickremesinghe-a mi mal in pawh an hal.
A hmain party tin lalna sorkar din a nih theih nan leh civil mite him nan bân a tum thu a lo sawi tawh a; mahse, a hnu lawkah a in kang lai video thehdarh zui a ni.
Prime minister hi a in dangah a chhungte nen an cheng a, tuna an hal hi chu a hna thawhna atana a tih bik a ni.
President leh prime minister bân tum hi mipuite lungawina khawp a ni dawn em hriat a la ni lo.
Colombo-a human rights lawyer hriat hlawh tak, Bhavani Fonseka chuan, “Mi pahnih bân chauh hian an thil phut a tifamkim lo va, an duh chu kalphung thlak a ni a; mahse, president leh prime minister an kian hi chu bul tanna pakhat chu a ni ngei,” a ti.
“Thuneihna inhlanna muanawm tak a awm a tul a, chu chu a ni dawn em kan la hmu rih lo a ni,” tiin a sawi bawk.Sri Lanka a bul atangin
Sri Lanka hi India chhim lam chiaha awm, thliarkar ram a ni a. Kum 1948 khan British rorelna lak atangin zalenna an sual chhuak a. Hnam/pawl lian tak tak pathum – Sinhalese, Tamil leh Muslim awmin hengte hi an rama cheng mi maktaduai 22 zinga 99% zet an ni.
Kum tam tak chhungkaw khatin an ram rorelna fawng an chelh tawh a. Mahindra Rajapaksa hi an rama tam ber, Sinhalese-in an ngaihsan niin kum 2009 khan inlak hran tuma bei nasa tak, Tamil hel a hneh vang a ni a. Hetih lai hian a unaupa, Gotabaya hi defence secretary a ni.
An ram eibar dinhmun hniama chhe mek hian an ram a tibuai nasa hle a. Ram dang atangin thil an lak luh theih loh avangin ei tur, damdawi leh tuialhthei man a sang em em a, mi narante chu khawlaiah chhuakin Rajapaksa chhungkua chu bâng turin an nawr nasa ta hle a ni.