Mizoram Pradesh Youth Congress Committee (MPYCC) chuan nimin khan NEUM leh Mizoram sorkar inremna a taka tihhlawhtlinsak tur Chief Minister Zoramthanga an ngen.
MPYCC hi an Treasurer Ngurdingpuia Pachuau hoin chief minister hnenah NHM hnuaia thawkte thil phut tihhlawhtlinsak tur leh Central YMA palainaa NEUM leh sorkar inremna a taka a hlawhtlin ngei theih nan ngenna ziakin an thlen.
An lehkhaah hian chief minister chu finance department changtu a nihna angin, NHM thil phutte chu tihhlawhtlinsak tur leh NEUM duhdan angin study group report chungchang te, hlawh lak leh MESMA hlih chungchang te, show cause notice hlih chungchangte hmalak nghal tur thu NEUM leh sorkar inkara palai hnathawktu Central YMA hnena a lo sawi chu a takin a thleng em tih an enzui ve reng dawn thu an tar lang.
“COVID-19 hripui avanga Mizoramin harsatna nasa tak kan tawha mahni nunna thapa ral hmatawng hna thawktu NHM hnuaia thawkte lungawi lohna avanga chawlh an lak avangin i sorkar pawhin Mizoram Essential Services Maintenance Act, 1990 (MESMA) a puan hnan an ni a, hemi hnu July 16, 2022 khan NHM hnuaia thawkte chu Mission Director NHM hming ziakin ‘Show cause notice’ pek an ni ta hial hlawm a ni,” tiin MPYCC lehkhaah hian ziah lan tel a ni bawk.
Congress Thalai hian chief minister hnena health care chungchanga ‘Ultimatum’ an lo thehluh tawh leh Lalhriatpuii (L) zangnadawmna Rs. nuai 100 chungchang an tar lang tel bawk a ni.