Uruguay striker Luis Suarez chu an ramah a kir leh a, a club hmasa ber Nacional a zawm.
Kum 35 mi hian tun nipuiah Atletico Madrid a contract a neih a hman zawh hnuin club vawnlai nei lovin hun engemaw chen a awm a. Ngaihventu engemaw zah nei mahse an rama kir leh a thlang.
Season liamta a Primera Division a pahnihna hauhtu Nacional hian inremna an ziah hi a rei zawng an sawi lo.
Suarez hian Nilaini khan social media kaltlangin a kir leh tur thu hi a lo sawi tawh a. “Nacional kawr ka ha leh tur hi ka lawm a, ka phur tawh hle. In zavaia chungah lawmthu ka sawi a, kan inhmu thuai dawn nia.” tiin a sawi.
Nacional fans te hian Suarez hi an lawm hle a, tunhnaia a kir leh dawn nia thu a than hnuah an club inkhelah mi 20,000 vel bawrin Suarez a lem chuanna hmaikawr an inkhel ennaah an vuah.
Kum 2005 khan kum 18 mi niin Nacional-ah professional football a khel tan a, league match 27 atangin goal 10 a khung.