Season liamta a league a an inhamtan hram hnuah Everton in intihchak lam an hawi chhunzawm a. Burnley winger Dwight McNeil chu an lalut thuai dawn.
Kum 22 mi English winger hian Ningani khan club-ah medical a nei a, Pound maktaduai 20 velin Goodison Park a zawm dawn niin a lang.
Toffees boss Frank Lampard chuan Pound maktaduai 60 a Richarlison an chhuahtir hnuah tlarhma lamah duhthlan tur neih belh a duh a, hei vang hian attacker an dap kual.
Burnley tana vawi 147 khel tawh McNeil hi Clarets player an lakluh pahnihna a ni dawn a. Defender James Tarkowski chu free transfer in an lalut tawh. An forward Max Cornet nen pawh inbiakna an nei hman.
Everton hian Sporting Lisbon defender Ruben Vinagre chu season tluan atan loan in an hawh fel bawk.
Kum 23 mi left-back hian season liamta kha loan in Wolverhampton Wanderers atangin Sporting-ah hian a hmang a. June thla khan Portuguese club in a nghet a an lei hnuah an hralh lehnghal a ni.