PC party senior vice president Vanlalruata’n Grape leh Wine chungchanga sorkar chet dan hrang hrangin sorkar awmze neih loh zia a pholang niin a sawi.
Vanlalruata chuan "FOCUS (Fostering climate resillent upland farming system) atangin khawchhak tlangdunga Grape chingtute mi engemawzat ṭanpuina pek an nih thu sawiin, midang pawh pek leh tum mek an nih thu a sawi a. "Mizoram sorkarin Grape ching tawh sate a tihbuai char char laiin, mi engemawzat a chin thar tir leh a, Mizorama kan Grape chin hi table variety (a puma ei mai chi) a ni lova. Hei hi sorkar pawhin a hre chiang em em. A hman theihna awm chhun chu wine siamna atana hman a ni, hei pawh hi sorkarin a hre chiang" tiin, Wine siamna atana hman tur sorkarin a chin belhtir a wine tam zawk siam chhuah tuma hmalak- na ni bera a ngaih thu a sawi.
"Wine siamna tur chin belh tir leh lawi si hi tunhnaia Grape an man leh Mizoram liquor (prohibition) act, 2019 nen a inkawlkalh tlat" Vanlalruata chuan a ti a. "Dan hmanga wine siam leh zawrh khap a nih lai leh a zuartute pawh man an nih laia wine siamna tur grape an chin thar tir leh lawi si hian sorkar awmze nei lo a nih zia a tarlang a ni" a ti bawk.
PC party sr. vice president chuan "Keini chuan awmze neia thlai chin leh thar chhuah sawngbawla a chingtute leh a sawngbawltu ten harsatna an tawh miahlohna tur policy 'Khawl Hnuh Hmasawnna - Mi tin tan In leh Hna' neiin kan tlangzarh tawh a. A hlawhtlin nan kan bei zel dawn a, hmalakpui turin mi zawng zawng kan sawm", a ti bawk a ni.