- David Zochhuanmawia (Vida Hrahsel Saza)
Right to Information Act, 2005 in min phalsak angin Agriculture Department hnuaia Vaimin chi sem chungchang zawhna engemaw zat chu April 28, 2022 khan Agriculture Directorate-ah ka thehlut a. A hun chhunga chhanna ka hmuh loh hnu July 21, 2022 khan a chhanna ka dawng a ni.
Appellate Authority lamah ka zualko a, ka complaint letter copy pawh Chief Information Commissioner hnenah ka pe thlap bawk a. Lehkha ka thehluh ni hian Agriculture Director nen pawh kan inkawm nghe nghe a ni. Kan sawi dun angin he Project hi Department lam tan chhan a harsat avanga a hun chhunga min chhang thei lo an nih thute min hrilh a. MNF sokar hnuaia Planning leh hotu lawkte sawi dan a inan loh avang nia hriat a ni.
A hnuaia zawhna leh chhanna pawimawh zual hi thlirho ila-
Q. SEDP hnuaiah Agriculture Department kal tlangin thlai chi engte nge sem a nih? Eng zat nge sem a nih hlawm? A chingtu tûr (beneficiary) engzat nge thlan an nih?
Chhanna – SEDP hnuaiah Agriculture Department hnuaia thlai chi sem chu ‘Vaimim chi’ a ni. Tun dinhmunah Vaimin chi 271920 Kg sem chhuah tawh a ni a. A chingtu tûr beneficiaries zat chu 13596 Nos. a ni.
Zawhna pakhatna chhannaâ a landanin SEDP Agriculture hnuaia thla chi sem chu ‘VAIMIM CHI’ a ni ngei tih an nemnghet a. Zawhna pahnihnaah hian ka zawt nawn leh kher bawk a. Heta an chhanna hi en leh ang.
Q. Vaimim chi sem mek hi SEDP hnuaia sem a ni em? Vaimim chi hi Department-in direct-in a lei nge Supplier kaltlanga a lei? Leina rate engzat nge?
Chhanna – Tuna Vaimim chi Agriculture Department-in a sem mek hi SEDP Pilot Project hnuaia sem a ni a. SEDP hnuaia Vaimim chi hi sorkarin Direct Procurement Rule 17(1)(g)(iii) of MPPR-2020 vide Finance Department concurrence ID No. Fin(EC)1953/2021-22/AGR: dt. 16.3.2022 hmanga min phalsak angin National Agricultural Co-Operative Marketing Federation of India Ltd. (NAFED), Madhya Pradesh-ah direct-in Agriculture Department-in a chah a ni. Vaimin chi leina rate chu Rs 143.50 per Kg a ni.
Q. Vaimim chi dawngtu tûr hi tute thlan nge?
Chhanna – Benefeciaries-te hi Agriculture Development Board Meeting thu chhuak anga thlan a ni.
Q. Vamim chingtuten an hralhna tûr emaw, an tih ral dan tur emaw ruahmanna siam a ni tawh em? A awm chuan kimchanga hriat ka duh e.
Chhanna – Vaimim chingtute’n an hralhna tûr chungchangah hian sorkarin ruahmanna a siam mek a, peih fel thuai beisei a ni.
A dawngtu thlan danah-
Benefeciary thlan danah Agriculture Development Board Meeting thuchhuak anga thlan a ni tih hi a dik ngei ang a. Mahse, veng leh khaw tin Ruling Party (MNF) Unit hruaituten a dawng tûr an thlang niin a lang lawi si. Engpawh nise, a semtute leh a sem dan chu engpawh ni rawh se. Lo neitu kuthnathawktu ngeiin a thlawna Vaimin chi an dawn zozai pawh thil lawmawm tak a ni ang. Mahse, lo nei lêm lo tan SEDP chêng nuai 3 sem theih loh avanga a aiawh ang deuha hmaiphihna ang leka ti an nih erawh chuan a fuh lo ngawt ang. Mipui hi bum mai mai chi kan ni tawh lo a nia. Mi pakhat (chhungkaw 1) tan 20Kg, 18Kg, 15Kg, 14Kg, 10Kg tea sem a ni hlawm a. A chang tam leh chang tlem deuh an awm bawk.
Sorkarin sum engzat nge a sên ral tawh?
SEDP Vaimim chi semna atan hian chêng nuai tam tak a sêng ral tawh a. 1 Kg Rs 143.50/- in Agriculture Department-in a chah thleng a. July 21, 2022 thleng khan 271920 Kg an sem ral tawh tih RTI chhanna atangin kan hmu a. SEDP Vaimim chi semna atan tun thlengin sorkarin Rs 3,90,20,520/- (chêng nuai zathum sawmkua, singhnih leh zanga sawmhnih) a hmangral tawh tihna a ni.
A tlipna-
MNF sorkarin mipui hnena a intiamna chêng nuai 3 a sem thei dawn ngang loa inngaiin SEDP hming put tírin Vaimin chi a sem ni berin a lang a. Mi pakhat tan 10 Kg – 20 Kg te in an sem tlangpui a ni. 271920 Kg teh meuh an sem chhuah chuan chêng nuai tam tak a kal ral tawh tih kan hria a. A taka taka hlawhtlin puitu erawh a dawngte zingah mi engemaw zat awm se a duhawmin ka duhsak tak zet a. Hlawhtlin pui miah lo tûr hi an thahnem bawkin ka hria. RTI hmangin a dawng zawng zawng list hi ka nei vek a. An semchhuah dawn a, mahni Signature ni miah lo tih hriat fê fê leh mi pakhatin a dawng tûrte aiawha a sign ni ngeia hriat theih pawh a awm nawk mai.
Engpawh nise, kan ramah hian dikna leh rinawmna in hmun luah khat leh se a awhawm hle mai a. Mizoram zim te, ar hmai tiat leka chêngte hi in itsik lovin inhmangaih thar leh ila, ram hruaitu leh Kohhran hruaitute thawhhona tha sela; Sorkar hnathawk te indik siak sela; ram mipui pawh Pathian hnena kan kir leh a ngai a ni. He khawvelah hian kumhlun tûr kan awm lo a, mit khap kâr loa ral mai thei kan ni tih i inchhut nawn leh ang u. Hawh u, mi dik ngaihsan nachâng hria ila, i dik tawp mai ang u, a har lo êm mai.