- Centenary C. Lalzahawma
Ruahmanna tha tak neia a taka tizui leh si lo chu; thing phun teuhva enkawl zui leh si lo ang a ni.
Thufingte 29:4 thuah chuan, “Dik taka lalin ro a rèl chuan ram a phuisui a, thamna a lák chuan ram a chhe thìn,” tih kan hmu. Kan ram roréltute rorèl dàn leh kan ram dinhmun chu sawi sei ngái lovin kan hre theuh àwm e. Mahni páwl (party) mi leh sa an nih avàng emaw, kan awmna páwl (party) a nih avàng emaw pawh ni sé, kan pute dik lohna thuppui tlattu leh an dik lohna sawi màmsak tum tlattu nih te hi Pathian ringtu dik tak tán chuan tih loh tawp tùr a ni. Ram hruaitu mawhphurhna hre reng chung si a dikna ngái pawimawh lo leh zuitu rinawm lo nihna mai a ni. Tin, kan chhiar zêl chuan bung 29:12-ah, “Roréltuin dâwt thu a ngaihsàn chuan, a chhiahhlawhte zawng zawng an sual thìn,” tih thu kan hmu bawk. Siamtu [Pathian] áia pute hlau zâwk kan tam viau lo’ng mawt Pute’n êk tum pawh, “Lung tum a ni,” an tih chuan, keini a zuitute’n pute kan hlauh vàng emaw, a rûka thil beisei kan neih vàng emawin, ék tum a ni tih hre reng chung sìin, “Nia, lung tum a ni,” kan lo ti vè mai ang tih a hlauhawm hle. Chutiang mihring, dikna tan ngam lo kan nih chuan kan pute dinhmun anga kan din vè hunah pawh Zoram hian that lam áiin chhiat lam a pan nasa zual ngèi ang. A hausa an hausa tual tual ang a, a rethei an rethei tial tial ang a, hmun hrang hrangah rûkrûk a hluar ang a, hmun tinah tualthahna a thleng mai ang. Chutiang a thlen loh nán ram hruaitute’n hmangaihna nèn ram mipuite kan hruai a, kan enkawl a ngái a ni.
Hruaitu chu Motor kè hma lam ang an ni. Motor kè hnung lam chu eng anga tam pawh ni sé, Motor kè hma lam kalna apiangah an zui vè mai thìn. Motor kè hma lamin a dài sual chuan a kè hnung lam chuan a dài sual loh chhan tùr a awm lo. Chuvàngin, hruaitute hi an pawimawh hle a, a bîk takin hruaitu hluite hi an pawimawh lehzual. Engkimah entawn tlákin an awm a ngái a ni. Hruaitu hmasain dikna a nunpui tlat chuan, hruaitu thar pawhin dikna a nunpui tlat a, hruaitu hmasain a eirûk fo chuan, hruaitu thar tán pawh eirûk vè mai a awl thìn. Chutiang zêl chuan thil dang tam takah pawh hruaitu hluite hi hruaitu lo la awm zêl tùrte entawn an ni thìn. General Eisenhower-a pawhin, “A zuitute tána entawn tùra insiam ngam hi hruaitu thà a ni,” a tih kha. Ram kan hruainaah min zuitute tána entawn tùra insiam ngam hruaitu nih kan tum tùr a ni.
Mi pakhatin General Douglas McArthur-a hnênah tihian a zâwt a, “Hruaitu tán engnge tûl ber?” tìin. Ani chuan, “Mahni hmasial lohna,” tìin a chháng. Hruaitu tha ni tùr chuan mahni hmasial loh a ngái a, mahni pumpui chauh ngaihtuah lovin, mi rethei zâwk te leh ram mipuite pumpui pawh kan ngaihtuah tel a ngái. Mahni hmasial tak, mahni chauh inhmangaih, mahni chauh inngaihsak, mi dang hmangaihna nei miah lo ram hruaitu thà an awm ngái lo va, ram mipuite lungáwi lo hmél hmuh tùr a tamin, ram pum a rethei thìn.
Thuhriltu 5:5 thuah chuan, “Thu tiama hlen si loh ái chuan tiam loh law law hi i tán a tha zâwk,” tih kan hmu a. Charles Spurgeon-a chuan, “Dàn naránin thutiam zung zung mi chu a tiha tih lamah an tuan a fum tlángpui,” a ti bawk. Ram hruaitu tha neihna ramah rêng rêng ram hruaitu, mahni thutiam bawhchhe zung zung leh, mahni thutiam ngái pawimawh lo an awm ngái lo. Sawi anga awm lo hruaitu thà khawvêlah an awm lo miau a ni. Inthlan dáwna tlin duh vàng ringawtin ram mipuite dâwt thu kan tiam ang tih a hlauhawm hle. Rousseau-a chuan, “Thutiam harsat takte hi mi rinawm tak an ni cháwk,” a ti. ‘Thutiam zung zung thìn, thutiam harsat lo tak takte hi thutiam hlen ngãi mang lo leh mi rinawm lo an ni duh’ a tihna a ni ber mai.
Mizo Thufingin, “Sial rângin sial râng a hring, Sakáwlin sakáwl a hring,” a tih ang khán, ram hruaitu thàin ram hruaitu tha a chher chhuak a, ram hruaitu thà lovin ram hruaitu thà lo a chher chhuak thìn. Chuvàngin, ram hruaitu, mahni áia thà zâwk, engkimah a hun leh a hmun azira insiam rem thiam, mawhphurhna hlen chhuak zêl thei zuitu thà chher chhuak tùrin ram hruaitu la ni mék te kan inbuatsaih a ngái a ni.