MPCC General Secretary Lalrindika Ralte, MLA chuan man tlawm zawka buhfai lei theih a nih laia man to zawka sorkarin buhfai a lei chu tul loa mipui sum tak tak khawhralna a nih avangin tihtawp vat a tul niin a sawi.
Aizawl Press Club-ah nimin khan thu thar thehdarhtute kawmin Lalrindika Ralte hian tuna sorkarin supply department kaltlanga open market-a buhfai a lei dan chu a leina man hi sorkarin a bithliah tih sawiin, “ZIDCO kaltlangin lei thin a ni. Heti chung hian sorkar chuan buhfai lei nan hian sum tam tak a la hloh reng a. Buhfai quintal khat hi Rs 2,750-in a lei a, Rs 1,500-in a hralh leh a. Quintal khat zela sorkar sum hloh hi Rs 1,250 a ni,” a ti.
Lalrindika Ralte hian sorkarin man tlawm zawka buhfai a lei theih reng laia man to zawka a lei avangin buhfai leina leh a chhehvela pawisa tam tak luangral hi ram sum leh pai indaih lohna thlentu pakhat a nih thu a sawi a. Ram sum leh pai dinhmun siam that nan leh sum hloh a tlem zawk theih nan buhfai lei leh a chhehvela pawisa kal ral hi tihtawp vat a tul tih a sawi.
Buhfai leina man bithliahtu hi sorkar a ni chunga man to taka sorkarin buhfai a lei hi tul loa mipui sum tam tak khawhralna a nih thu sawiin, “Tuten emaw lo hlawkpui viau mah se, ram sum dinhmun harsatzia ngaihtuaha man tlawm zawka lei ngei turin Mizoram sorkar ka ngen a ni,” a ti.
Hachhek bialtu MLA sawi danin January, 2022 atanga June, 2022 (thla 6 chhung)-a ZIDCO kaltlanga buhfai a lei tawh zat chu quintal 2,95,000 niin, a lei nan Rs 81,12,50,000 sen a ni. Heta sorkarin sum a hloh zat chu Rs 36,87,50,000 a ni a. Thla tina sorkar sum hloh chu Rs 6,14,58,333 a ni. Kum khat chhunga sorkar sum hloh zat chu Rs 73,75,00,000 vel a ni.