Sorkarin cooperation department-a Additional Registrar of Cooperative Societies (RCS) pension tawh, Lalrinsanga a rawih nawn thu kal zelah Mizoram Co-operative Forum (MCF) chuan rawih nawn hi tha tiin sorkar chungah lawm thu an sawi a, Mizoram Co-operative Society tangrual pawl erawhin rawih nawnna order sut an phut.
Nimina MCF extended OB thukhawm chuan co-operation department-a Addl RCS pension tawh rawih nawn leh a nih avang hian mi dang services a tibuai lo tih sawiin, department-in a mamawh avanga Addl RCS rawih nawn a ni chu tha an ti a, an thlawp tlat a, sorkar chungah lawm thu an sawi.
MCF chuan tunah hian coperation department-ah Addl RCS post khat leh Joint RCS post hnih awm mah se Addl RCS post hi hnawh khattu an awm lo tih sawiin, joint RCS post hnih a awm chungin post khat chauh hnawh khat a ni bawk a, a hnawh khattu pawh hi January, 2023 maiah hian a chhuak dawn tih an sawi a, “Addl RCS hi rawih nawn ni lo ta sela, heng post hnih, mi pathum awmna tur post hi luahtu awm lovin 2025 thleng a awm dawn,” an ti.
Mipui leh department mamawhna leh tul bikah chuan department dangah pawh inrawih nawn mai bakah service hun pawhsei pawh an awm reng tih MCF chuan sawiin, department danga pension rawih nawnte dodal loa cooperation department-a mi chauh MZP-in an dodal chu an hrethiam lo tih an sawi.
Hetih lai hian Mizoram Co-operative Society tangrual pawl inkhawmpui resolution siamin Addl. RCS Lalrinsanga rawih nawnna chu sorkarin sut leh ngei se an duh thu an tar lang ve thung.
MCF thuchhuahin a tar lan danin Lalrinsanga, Addl RCS hi May, 2022 khan a pension a, sorkar chuan August 1, 2022 atanga kum khat chhung, July 31, 2023 thleng ruai nawn turin order a tichhuak thung a ni.
Tar lan tawh thin angin sorkarin Lalrinsanga a ruai nawn hi MZP chuan duh loin, inrawih nawnna order chu sut turin sorkar an lo ngen tawh a, August 1 khan order hi Vanapa Hall kawtah halin, a tuk Thawhlehni khan Add RCS pisa kai tur dang hian cooperation department office kawtah an pungkhawm leh a ni.
Hemi ni hian Addl RCS hi pisa a kai lo a, ni thum chawlh a lo la a. Vawiin hian pisa a kai leh ni tur niin, MZP chuan na zawkin pisa kai tur hi dan tumin an lo rel lawk tawh a ni.