Kumin January atanga June thla thleng khan Mizoramah TB natna vei mi 1090 hmuhchhuah an ni a, he kum chanve chhung vek hian Mizoramah TB natna avanga nunna chan mi 39 an awm.
National TB elimination porogramme, Mizoram report-a a lan danin kumin kum chanve chhunga Mizorama TB natna vei hmuhchhuah 1090 zinga mi 191 te chu HIV hrik pai an ni a, mi 64-in TB pangngai aia tihdam harsa MDR-TB (Multi drug resistant) an vei.
Kumina TB vei hmuhchhuah zinga 67 ten zunthlum an nei tel tih hmuhchhuah a ni a, TB vei hmuhchhuah zinga 353 te chu zuk leh hmuam ti mi niin, zu in mi 148 an awm bawk.
Aizawl district-ah kumin kum chanve chhunga TB vei hmuhchhuah tam berin, mi 685 hmuhchhuah an ni a. Mamit district-ah TB vei hmuhchhuah tlem berin mi 17 hmuhchhuah an ni.
HIV hrik pai te, zunthlum nei te, zuk leh hmuam ti mi leh zu in mi te tan TB vei a awlsam bik avangin TB vei hmuhchhuah te chu endik nghal vek thin an nih thu State TB elimination programme hotu ten an sawi.