Aizawl Mayor Lalrinenga Sailo chuan Aizawl khawpui bawlhhlawh sawngbawlna, Tuiriala Solid Waste Management Centre (SWMC) chu kum 2011 census mila siam a ni a, kum 10 hnuah chuan mihring an pun anga bawlhhlawh a tam zel avangin khawpui bawlhhlawh a dawl zo tawh lo tih a sawi.
Nimina SWMC an tlawhnaah mayor chuan SWMC-ah hian ni tin Aizawl bawlhhlawh trip 150 chuang phurh luh a ni a, helai hmuna khawl an dah leh bawlhhlawh thliartu mihringten an buaipui zo ta lo tih sawiin, “SWMC-ah hian truck trip 10 bak chu ni khatah kan buaipui thei lo,” a ti.
Mayor chuan bawlhhlawh sawngbawlna hmun hi chhungkaw 100 chuangin eizawn nan an hmang a, bawlhhlawh hman nawn theih tam tak hralh a ni tawh tih sawiin, bawllhlawh tawih thei hmanga lei tha an siam chhuah pawh thahnem tak hralh chhuah a nih tawh thu a sawi.
AMC-in SWMC hi thla nga pumhlum an enkawl tawh chhungin duhthusam tawk lo awm mah se India ram chhungah bawlhhlawh sawngbawl kawngah hma la tha ber an nih thu Rinenga chuan a sawi a ni.
Hmun dangah bawlhhlawh sawngbawlna siam tuma hmalak mek a nih thu sawi tel bawkin, “Plastic bik hi la hrangin Luangmualah bul tan leh mek a ni a, Aizawl chhim lam hman tura Hualngohmuna Solid Waste Management Centre siam kan tum atan pawh DPR kan peih a, estimate pawh siamin hna tan vat tum a ni,” a ti.
Khawpui faina leh bawlhhlawhte sawngbawlna kawngah sorkarin theihtawp a chhuah zel dawn tih sawiin, mipui pawhin mawhphurhna tam tak an nei tih a sawi.
Ningania helai hmun tlawhtu ZPM Legislature Party-ten luiah bawlhhlawh nawr liam thin anga an puhna chu chhang letin Rinenga chuan SWMC-a bawlhhlawh dah luhte chu tum reng vanga luia nawr thlak a awm an hriat loh thu sawiin, “Chutihrual chuan bawlhhlawh an dah khawm thenkhat erawh hmun hniam zawkah a liam thla tih erawh phat rual a ni,” a ti.
In sakna bungrua, demolition waste-te paihna hmun tur chu sorkarin a zawng mek tih a sawi a, hetihlai hian a hmun tur erawh khawpui hnaivaiah a vâng hle tiin, sorkar pawhin a duh ang tak hmun tha a hmuh thuai an beisei tih a sawi bawk a ni.