- Mahmuaka Chhakchhuak
‘A nia sin’ tih hi mizopa tawngkam hman lar tak a ni a, midangin thil an sawi a, pawm lem lo pawh nisela ‘a nia sin’ an han tih hi chuan ngaih a tha ve thei reng mai thin. A awmzia berah chuan tawngkam tha pangngai tlanglawn tak a ni ber a, midang hnial hreh vanga thinlung pawnlang taka tawngkam phuhchhuah satliah mai mai ang chauh a ni thei bawk awm e.
Mizopa thenkhatte hi chu kan han inti fing thin khawp a, thil pawh hi kan hre hlawm viau. Nimahsela kan thil hriatna leh finnate chuan hma min sawnpui tak tak lem lo thung a, titiah kan ral leh mai thin hi chu a pawi viau a ni. Tapchhak zawlah thingpui senhang kan han chhemvir map mai a, chapo hmel ni chiah silo leh uang hmel pu bawk si loa thu bengvarthlak deuh kan han sawi tawh hi chuan a ngaithlatute lahin ha-hni dai dukin an la ngaithla a, ka a han kal tawh laklawh phei chuan engpawh sawi ila an awih em em vek tawh mai emaw tih tur hi a ni thin. Chutiang hunah ngat chuan titi-a distinction pass leh pass loh chu a hriat a, tute emawin tawngkam thiam lem lo leh hmanhmawh lo taka thudik tak leh sawiselna tur engmah awm lo an sawi ai pawh chuan a awihawm tawh bik tlat thin. An tawngkam reng reng chuan beng a verh bik tlat a, a chang phei chuan an sawina hmun a zirin kutben hluah hluahna thamte pawh a ni fo thin.
Kum 1787 daih tawhah khan Philadelphia Convention an tih mai, USA Constitution an buatsaih laiah khan mahni hmasial takin dan siam an tum hlawm a. Massachusetts atanga palai Elbridge Gerry chuan USA hian indo lai lo chuan sipai 3,000 aia tam a nei tur a ni lo tih Constitution-a dah a rawn rawt tlat mai a. Chu rawtna atthlak lutuk tak mai chu Chairman George Washington chuan fimthu ti tak deuhin ‘Chutiang a nih chuan kan Constitution-ah hian Khawi ram pawhin sipai 3,000 aia tama USA an beih chuan US Constitution kalh tlat a ni tih i ziak ve nghal law law ang u hmiang’ tiin a chhang let a, an nui hluah hluah a ni awm e. Hetiang deuh hi keini pawhin kan tawng foin a hriat a, CoviD hripui lengin min chimbuai zual lai tak takah phei kha chuan thu mak sak pui pui kan hre fo a ni lawm ni kha?
Mizote hi hnam dang ang lo deuhin rualpawl thiam tak kan ni a, kan pi leh pute hunlai atang daih tawh pawhin then leh rualte kawm thiammi kan ni. A chang phei chuan a hun leh hmun pawh hre loa inkawm bawrh bawrh mai thin kan niin midang mitmei pawh veng lem loa awm ching tak kan ni. Tumkhat pawh mi pakhat hian a thianpa Offfice-ah kekawrbul nen tlangnel takin a leng a, a thianpa lah chu midang nen an lo awm bawk si a, a hau ngam chiah si lo a, a rilru a hrehawm lutuk a ni awm e. Chutiang chuan hmuntinah midang vengthawng loa mahni tal tala tal mai mai chi hi kan la awm a nih hmel. Hei zoram pumah sum leh pai harsat thu kan han hriat hnu pawhin tute emawni chuan an tawngkam an la tidanglam duh chuang miah lo a nih hi.
Mizoramah hian mipui nuaih 12 vel kan cheng mek a, thenkhatte chuan Kolkatta kawtthler pakhat pawh kan zat lo e an han ti tak nain mipui heti zat lekah pawh hian nitina sawi tur mak tak tak hi chu a awm reng thin tho a. Zankhat lek daih titi te pawh a awm a, titi chhunzawm zui chakawm chiah lohte pawh a awm bawk thei ang. Tunlaiin ‘Tuai’ chungchang kan han sawi hlut a, sawi awm tak pawh a ni ang a, nimahsela an pung telh telh emaw tih mai tur a ni. Anmahni lah chu an zak duh der chuang lo a, nimin maia City Bus-a ka chuanpuite phei kha chu zak lo tak hi an ni. Hetiang lo lam, ram mipuiin kan sawizui chak vak loh thin leh pawimawh zawk tak tak pawh a tam a, sorkar department hotute lu ti hai tak tak tura Contractor inluling takte pawh sawi tur tam tak a awm ang. Anni Contractor phena midang awm chu an hlauh zawk si avangin hmaichhana an hmuh mek Contractor chu biakchhiat ngam a nih si loh avangin Department hotute lu an ti hai thin viau a ni awm e.
Kan Kristianna ngei pawh hian min thununin min veng zo meuh thin lo chu a ni ber a, kohhran lama chanvo kan neihte pawh hian awmzia a awm meuh lo chu a nih ber hi maw. Heti chung hian ‘Kristian’ chu kan la inti bawk si a, keini ang Kristian hi ram dangah hian awmve tak maw le? Pastor nupui pakhatin ‘Pathiannia hlim tak maia ka han lam hi chuan kar tluangin ka hnathawhna hmunah pawh min veng thin’ a tih hi ka hre reng a, a ni chuan Pathian fak leh chawimawina atana Pathiannia a lam chu a nitin hnathawhnaah ngei pawh awmzia a awm tihna a nih chu. A ni ang hi ni vek thei ila chuan kan ram hian hmel thar kan neih phah ngei hi ka ring hial a, kan Kristianna ngei pawh hian belhchian a dawl zawk ngei ang. Nimahsela, kan heti tlat si a nih hi……
Kan chetdan phung tam takte hi chuan Kristian kan nihna a lantir mawlh lo a, kan tawngkam tam takte ngei pawh hian midang tan malsawmna a thlen mawlh si loh avang hian a nia hmun dang Kristiante nena kan in ang theih loha kan danglamna bik ni thin chu. Kristiannain ram rorelna hmunah ngei pawh hmun a chang tak tak ngai lo a, chu chang ni loin kan biakbukah ngei pawh hmun a chang tak tak lo chu a ni ber lawm ni. Hetiang hian kan dinhmun dik tak leh kan nihna dik takte hi han sawi thin mah ila, tute emaw chuan an danglam phah tak tak dawn chuang lo tih pawh a chiang reng a, an kiangah han sawi ve thin mah ila ‘A nia sin’ tih chauhin min chhang emaw hi a ni thin si a, an pawm tak tak lo tih pawh a hriatthiam theih reng tho thin si a.