Aizawl: India ram hmun dangte rualin National Handloom Day Vawi 8-na lawmna pualin Weavers’ Service Centre, Aizawlah hun hman a ni. ZOHANCO Chairman C Lalrammawia chuan khuallian niin a hmanpui.
Khuallian ZOHANDCO Chairman C Lalrammawia chuan National Handloom Day hman a ni chu ZOHANDCO tuai thar leh mek tan a hlu zual tih a sawi a. India Independence Day lawmna atan National Handloom Day hman chu a inhmeh viau a, a chhan chu India hi puan tahchhuah leh siam chhuahna lamah khawvelah a hmingthan phah a, India economy sep sangtu a nih thu a sawi a. Kut tah puan hnam thuam inbel uar zel turin kalkhawmte a chah.
Assam-in hausakpui nana an hman muga chin chu Mizoram leilung pawhin a ngeih avanga chin uar a that thu sawiin, tunah hian Khawzawlah pawh chin tan mek zel a nih thu a sawi a. “Kan hnam thuam siam chhuahna hi handloom a ni a, eizawnna tlo leh nghet a ni. Vawiina handloom tihmasawn tura puantahtu (weaver) lo kalte hian kan tahchhuah chu hnu hma mam, uluk i la. Hlawkna leh ngelngheh nan hman tum ang u,” a ti.
He hunah hian Dr. Rama Ramswamy, Nodal Officer, B.Voc (handloom), MZU chuan puan tahtute tana inzirtirna leh hmasawna rahbi thar kai dan turte inhrilhfiahna hun a hmang a. Hmingthianghlimi, Asst. Director, Commerce & Industry chuan puan tahtute tana hamthatna awm thei sorkar scheme hrang hrangte a hrilhfiah bawk.