Chelsea in Premier League champion Manchester City in an tih ngam loh an hlen a, Spain defender Marc Cucurella chu Pound maktaduai 60 chuangin an lei.
Kum 24 mi left-back hian Stamford Bridge-ah hian kum ruk contract a ziak a. Seagulls tana season khat a khelh chhungin fak hlawh hle in match 38 atang goal khat a khung.
“Khawvela club tha ber zing ami zawm theihna hun ka nei a, engkim kan tifel thei hi ka lawm hle. He club-ah hian hlim taka hun kan hman theih nan theihtawp chhuahin rim takin ka thawk ang.” tiin Cucurella chuan a sawi.
Brighton chanchin a player manto ber a ni a, nikum a Arsenal in Pound maktaduai 50 a an lei Ben White chu a khum.
Barcelona academy chhuak Cucurella hian Spain tan vawi khat a khel tawh a. 2020 Tokyo Olympics a silver medal la Spain under-23 team ah mi pawimawh a ni.
Manchester City in an tlarhnung veilam a khel turin an duh a, nimahsela Brighton in Pound maktaduai 50 an beisei tlat avangin City in tum hnih indawrna an kalpui hlawhtlin loh hnuah an umzui duh ta lova. Sum tam sen an duh lo.
Tun nipui a player hrang hrang nena sawizawm ni hnem tak Chelsea in player an lakluhna palina ni turin sum sen an inhuam a. Pound maktaduai 56 an pek phawt hnuah Pound maktaduai 7 an pek belh leh ang.