Aizawl bawlhhlawh paihna a mumal lo hle
Ningani khan ZPM MLA te chuan Tuirial a bawlhhlawh paihna hmun tlawhin, bawlhhlawh paih dan a mumal lo hle an ti a, environment tichhe thei zawnga bawlhhlawh la paih reng a ni chu pawi an tih thu an sawichhuak hial.
Bawlhhlawh paihna hi UD&PA dept. hnuaia awm SIPMIU in hun rei fe an enkawl hnuah AMC kutah an hlan fel tawh a, AMC lam hian a sawngbawl leh enkawl zui kawngah hma an la tha tawk lo nia lang hi a pawi hle.
ZPM Leader Lalduhoma chuan, “Gate luh chiah hian a hmun tura ruahman ni miah loah bawlhhlawh a vum thur a. A tawntirh maia bawlhhlawhte hi kawra nawr liam a ni a. Kawr hian Tuirial lui a fin a. Kan lui dunga bawlhhlawh paih lo tura min zirtirtu ber, a sorkar ber hian lui dungah kan bawlhhlawhte a nawr liam hmiah hmiah a, a dik lo hle a. Hei hi a pawi em em a ni,” tiin a sawi a, enzui atan a tha hle.
ZLP Secretary Dr. Vanlalthlana pawhin, mipuite bawlhhlawh thliar hrantir an nih laia a paihna hmuna thliar hran a ni ve lem lo chu pawi a tih thu a sawi ve bawk a; kan bawlhhlawh paihna hmun hi vilven leh enkawl uluk zual a ngai hle tih a chiang ta. Enkawltu nei lo ang maia a awm reng hi a dik lo a, kan hma hun lokal zel turah a tuar theitu chu keimahni bawk kan nih avangin hmala theitu chuan hmalak vat vat a hun tawh hle.