Portuguese midfielder Renato Sanches chuan French champion Paris St-Germain chu kum 2027 June thleng atan a zawm.
Kum 24 mi hian Lille atangin Paris khaw club hi a pan a, Ligue 1 title humhim an tumna kawngah PSG in an midfield an tihchak belh.
Kum 2019 August a Bayern Munich atanga Lille zawmtu Sanches hian an tan match 90 khel tawhin goal 6 a khung tawh.
Benfica chherchhuah Sanches manah hian PSG in Euro maktaduai 15 an pe dawn a, Paris khaw club hian Dutch midfielder beisei anga che tha lo Georginio Wijnaldum chu loan in an chhuahtir ve thung ang.
Sanches chuan, “Paris a ka lo kal thei hi ka lawm a, he club ka zawm hi ka tan thutlukna dik a ni ngei tih ka hria. Paris St-Germain ka thlan chhan hi ka tana team tha a tel theihna hun a ni a, France a cham zel hi ka ngai pawimawh a, league hi ka hrechiang tawh.” tiin a insawn chhan a sawi.
Stade Pierre Mauroy a Lille tana 2020-21 Ligue 1 title chaiw tawh Sanches hi PSG in nipui laia player an lakluh ngheh pangana chiah a ni.