Prime Minister Narendra Modi-an kum hnih kal taa a sak tanna lung a phum hnuah Ayodhya-a Ram Temple sak mek chu hna 40% zawh a ni tawh a, a chhawng khatna chu kum 2024-ah hawn theih a nih tur thu a saknaa viltu engineer-ten an sawi.
“In sak hautak tak a nih rualin a sak hna a chak a. Hmun thianghlim ber tur atanga bul tanin chhum lo chat lovin thawh a ni a. A bang atan hian Rajasthan atanga lak lungme senno hman a ni,” tiin a sak hna enkawltu, Ram Janmabhoomi Trust-in an chhawr supervising chief engineer panga zinga pakhat, Jagdeesh chuan a sawi.
Ram Temple sakna hmun hi Zirtawpni khan chanchinbumite tlawh theih tura hawn a ni a. NDTV team-in video an lak an thehdarhah chuan crane hmanga a bulthuta hman tur lung lian tak tak an chawi sawn lai pawh a lang a, ral hla deuh hleka lungme khawih lai pawh a lang.
“He hmuna kan thawk thei hi inchhuanna tham a ni,” tiin engineer dang, Utpal chuan NDTV hnenah a sawi.
Kumin June thla khan Uttar Pradesh Chief Minister Yogi Adityanath chuan hmun thianghlim ber, ‘Garbha Griha’ tur siamna tur lung phum hmanpuiin a phum.
He hmun hi kum 2024 Lok Sabha inthlanpui neih hmaa hawn hman tum a ni a, BJP pawhin an hlawkpui theih rin a ni.
“Kum 500 chhung harsatna a lo awm tawh a, tunah chuan chu harsatna chuan tawp lam a pan ta a; hei aia Indian-te tana chhuan tur ropui a awm bik chuang lo. Kan culture hi miin an bei thin a; mahse, a tawpah chuan India-in hnehna a chang thin,” tiin hemi tum hian chief minister chuan a sawi.
Ram Janmabhoomi Trust chuan hmun thianghlim ber sak nan hian Rajasthan-a Makrana tlanga marble var chah luh a nih thu an sawi a. Temple trust hian lung an hman tur zingah hian lungme chher man cubic feet nuai 8 atanga 9 vel, granite chher man loh cubic feet 6.37, lungme senno chher man cubic feet nuai 4.70 leh hmun thianghlim ber atan Makrana atanga lak marble var chher man cubic feet 13,300 an hman dawn tih an sawi.
Prime Minister Narendra Modi chuan a lungphumna hun, ‘Bhoomi Pujan’ chu August, 2020 khan hmanpuiin sak tan zui a ni.