aIZAWL: MNF, Kolasib block-in Kolasib bialtu MLA, Minister of state ni bawk K. Lalrinliana’n mipui, a bikin, miharsa zawk, chenna in neilote tana a hmalaknate lawmawm an tih thu an sawi.
Kolasib bialtu MLA chuan miharsa zawkte cu vote zawn nan chauh hmang lovin, khaichhuah tumna tak tak nen hma a la thin niin MNF Kolasib block chuan an sawi a. A hmalakna avangin Bairabi khuaah chenna in nei lo tan in hmun 80 chuang theh a nih thu leh Kolasib project veng-ah pawh in hmun 80 chuang theh mai theiha peih tawh a nih thu an sawi.
Mirethei leh harsate thlavang hauha, hamthatna an dawn pawh lawmpui bertu tura ngaih party thenkhatin in hmun neilote tana in hmun theh chu an dodal nia sawiin, MNF, Kolasib block chuan vanduaithlak an tih thu an sawi a. "Mipui sorkar din tuma inzuar mek party thenkhat ten miharsate leh chenna tur in neilote tana hmalakna thenkhat thika, a dodal zawnga an che ta mai hi mipui huap lo party an nih zia leh miharsate hamthatna hmuh ve tur pawh thikna mita entu an ni tih Kolasib mipui bakah, Zoram mipui hian hria se kan duh a ni" an ti.
MNF, Kolasib block chuan MNF ministry leh Kolasib bialtu MLA K Lalrinliana'n inthlan campaign laia an inzawrhna tam tak an tihhlawhtling tawh nia sawiin, an hmalak mekna te avang pawhin lawmawm an tih thu an sawi a. Kolasib tan leh Mizoram tana theihtawp chhuah zel turin Kolasib bialtu MLA chu duhsakna an hlan bawk.