Mizoram Pradesh Congress Committee (MPCC) President Lalsawta chuan pawisa hi ren taka a hmanna tur dik taka hman tur a nih tih sawiin, “Kan hmanna tur chu mipui tan a tangkai em tih leh, mipui rethei ber berten an tangkaipui em tih hi a pawimawh em em a ni,” a ti.
Congress Bhavan-a nimina chhung inkhawmah Lalsawta hian Congress sorkar laia Mizoram sum leh pai dinhmun an siam that dan sawiin, “Pu H. Liansailova planning-a a awm lai khan ngun takin kan ngaihtuah ho a, kum hnih chhung chu kan ram sum leh pai dinhmun sawhngheh kum, Year of Consolidation-ah kan puang a. Ren thei ang berin pawisa kan hmang a, kan ram sum leh pai dinhmun pawh kan ti tha hman viau a ni,” a ti.
Lalsawta hian pawisa hmanna kawngah hian hmanhmawhthlak leh hmanhmawkthlak lutuk lo awm thei a ni tih a sawi a. Mi an dam loh chuan an inenkawlna kha a hmanhmawhthlak a, ngaih pawimawh hmasak a ngaih thu sawiin, airport chei thatte pawh hna pawimawh tak a nih rualin hriselna lama hmalakna su buai khawpa hmalak hmasakna atana hman tur a nih loh thu a sawi.
“Pu Lal Thanhawla hi 9th Finance Commission member lo ni tawh a ni a, finance chungchang a hre em em a ni tih hi ziaka record awm se ka duh a ni. A kaihhruaina hnuaia finance minister ka nih khan a hahdam em em a. Ka thawhpuite minister leh MLA rualten dik lo taka thil ti turin min nawr lo bawk a, anmahni avang khan fakte pawh kan hlawh ve phah niin ka hria,” a ti.
Ram sum leh pai enkawl chungchangah a uikawm vanga sum hnutchhiah teuha MNF-in ren lo taka hmang zui hiau hiau anga an sawi thin chu a dik chiah lo tih sawiin Lalsawta hian, “Kan inthlang dawn tih kan hria a, kan tang em em a, kan minister zawng zawngte pawhin a tam thei ang ber hnathawh an duh a. Chief minister pawhin instruction fel takin a siam bawk a, ‘Pawisa hi kan hmang hman ngei ngei tur a ni, hman lohin a liam tur a ni lo,’ a ti a. Amaherawhchu, dan anga kal ngai a, DPR fel taka siam a ngai a, administrative approval leh tul dang tam tak a awm bawk a. Dan kalh a chet a rem bawk si loh avangin sum hman hman tak loh kan nei nual,” tiin, inthlan puan hnua finance commission atanga lo kal chawp a awm ve zel bawk avangin eng emaw zat hman bân an nei lo thei lo niin a sawi.
Congress party chu engtik lai pawha mi retheite nen inthen thei an nih loh thu leh an ban phaka an awm reng tur thu sawiin, mi rethei zawkten khaw êng an hmuh theihna tur hian Congress party chuan Pathian hruaina ringin an thawk zel dawn niin Lalsawta hian a sawi bawk.