ZPM thalai Sr. vice president Dr C Lalrammawia’n COVID19 hluar vanglaia quarantine centre leh Covid care centre hrang hranga ei leh in man Rs 66,37,385 chu tun thlengin Mizoram sorkârin a la ba niin a sawi.
ZPM thalai Sr. vice president chuan RTI hmanga zawhna chhannaa a lan danin COVID19 quarantine centre leh Covid care centre hrang hranga ei leh in man sorkarin a la bat zat chu Rs 66,37,385 a nih thu leh Covid volunteer-te hlawh Rs. 29,93,000 pawh sorkarin a la tih RTI chhannah tarlan a nih thu a sawi a. "Assembly session zawh na leh chhanna atanga a lan danin,Mizoram sorkarin state budget atangin lockdown lai khan lockdown avânga ṭam tuarte tan ṭanpuina pek a nei lo" a ti.
Dr C Lalrammawia chuan "CM relief fund for COVID19-ah kohhran, tlawmngai pawl leh mimal ten thawhlawm an chhunglut ruih ruih chunga heti zat zat leiba sorkârin a neih hi kan ring ngai lo, CM relief fund for COVID19 a ṭanpuina lutte kha khawiah nge a awm, tih hi kan zawhna a ni" a ti.
ZPM thalai Sr. vice president chuan MNF kaihhruai Mizoram sorkarin an sorkar tirh atanga hrilen lai March 2021 inkarah Mau chinna atan Rs. 272,60,431 a seng tawh nia sawi- in, hrilen lai thovin Kamrula hnenah Airport cheithatna tur Rs. nuai 7051 man hna a pe niin a sawi a. Hei hian an ngaihsak zawng leh an duhnaah chuan MNF sorkar chuan sum an ui lo hle tih a tarlang niin a sawi.
"COVID19 in hun rei tak chhung ziaawm lam a pan tawh hnu leh COVID19 hluar lai pawha CM relief fund for COVID19-ah sum tam tak a luh ruih ruih laia heti zozai sorkârin leiba a lo la nei hi ZPM thalai chuan pawi kan ti a, a dawng turte hnenah pe thuai turin Mizoram sorkar kan ngen a ni" a ti bawk.