Aizawla YMA hruaitute intawk khawm, thupui pahnih zir

Aizawl: Aizawl khawpui chhunga branch YMA hruaitu (office bearer)-te intawhkhawm hun, Zirtawpni zan khan Vanapa Hall-ah neih a ni a. Thupui pahnih, ‘YMA Kalphung Inzirtirna’ tih leh ‘Ram leh hnam humhalh nan ruihhlo do’ tih chungchangte sawi ho a ni.

Central YMA Vice President leh Kumpuan Sub-Committee Chairman ni bawk, Lalhmachhuana chuan ‘Ram leh Hnam humhalh nan Ruihhlo Do’ tih thupui sawi hawngin, “Kan ram, kan hnam hi kan vanduai hle a. Ven hneh si lohin thui tam ram dang nen kan inri a, inkalpawh awlsam em em si kan nei a. Hei hian ruihhlo leh dan loa sumdawnna tawlh rukna kal kawng kan ni a. Hnam tlem leh naupangte kan ni a, kan population atanga chhut hian ruihhlo ngai kan tam lutuk hi a manganthlak tak zet zet a ni,” tiin, Mizo thalai tam tak ruihhlo lak atanga chhan chhuak tur hian kil tin atanga kawng hrang hranga tan lak a ngaih thu a sawi.


‘YMA Kalphung Inzirtirna’ tih thupui sawi hawngtu, Prof Lalnuntluanga, General Secretary, CYMA chuan khawvel hmasawn mek zel rualin YMA pawhin hma a sawn mek zel a, YMA thatna tura ngaihtuahna seng tam tak an awm mek zel laiin YMA hmalakna tawh phawt chu a do zawnga ke pen duh an awm tak zel thu a sawi.


YMA kalphung leh kal dan duh khawp lohna an sawi lo tuoui thei zel YMA hruaitu zingah pawh a awm theih tih sawiin, “YMA hian a kal zelna turah kawng tha zawk a zawh theih nana thurawn petu, hmalatu leh ngaihtuahna seng thin hruaitu kan mamawh a. Sawisel ngam loh pawl (YMA) kan nih a hlauhawm a ni,” a ti.


Thupui pahnihte sawi khawmnaah hian hruaitu eng emaw zatin thu sawiin sawitu tam ber chuan Central YMA kaihhruaina hnuaiah kawng hrang hranga ruihhlo dotu tur ruahmanna siam an duh thu an sawi.


Hemi chungchangah hian chairman leh Central YMA president ni bawk, R Lalngheta chuan Central YMA Committee sangin ruahmanna siam se, khawpui chhung branch hruaituten lo ngaihchan theuh nise tia khaikhawmin he intawhkhawm hun hi tihtawp a ni.


He hunah hian YMA branch 108 awmah 97 atangin hruaitute bakah Central YMA OB-te leh Central Executive Committee (CEC) member-te nen mi 440 kal khawm a ni.