National Democratic Alliance candidate leh West Bengal governor hlui, Jagdeep Dhankhar chu India ram vice-president atan thlan tlin a ni.
Inrinnia parliament-a inthlanah vote 710 tla nung zingah vote 528 hmuin hneh taka thlan tlin a ni.
Eptu tangrualten an candidate, Congress hruaitu hlun, Margaret Alva-i chuan vote 182 a hmu ve a. Alva-i chuan Dhankhar-a hi eptu party dangten a ruk leh ruk lovin an thlawp nasa a, an hruaitute ngei hmangin an intichhia niin a sawi.
Inthlana Returning Officer, Lok Sabha Secretary General ni bawk, Utpal Kumar Singh chuan thlang thei mi 780 awm zing 725-in vote an thlak tih a sawi a, “Vote hi 92.94% a tla,” a ti.
Vote hi chawhma dar 10:00 atanga thlak tanin tlai dar 5:00 thleng hun hawn a ni a. Tlai dar 6:00 atangin vote chhiar niin zan dar 7.45 vel thleng chhiar a ni.
Vote tla 725 zinga 15 chu a thi a, vote 710 a nung a. Eptute chuan vote 200 dawn an hmuh an inbeisei a. Trinamool Congress MP 36 zinga pahnih chauhvin vote an thlak a. Mamata Bannerjee-i kaihhruai party hian inthlan hi an boycott a, Alva-i candidate a nih tur chungchangah an rawn ve lo niin an insawi a ni.